मोरङ : मोरङको केराबारीमा विवाह आयोजना गरिएको घरका सदस्यलाई आक्रमण गर्ने दुई जनालाई प्रहरीले पक्राउ गरेको छ । गत फागुन १५ गते भएको घटनामा संलग्नमध्ये दुई जनालाई प्रहरीले शनिबार पक्राउ गरेको हो ।
पक्राउ पर्नेमा केराबारी गाउँपालिका–७ का २९ वर्षीय मुस्कान लिम्बू र ३० वर्षीय विश्वास चेम्जोङ लिम्बू छन् ।
इलाका प्रहरी कार्यालय बेलबारीका प्रहरी निरीक्षक ऋषिराज ढकाल नेतृत्वको टोलीले मुस्कानलाई सुन्दरहरैँचा नगरपालिका–१२ र विश्वासलाई केराबारीबाटै नियन्त्रणमा लिएको हो । पक्राउ परेकामध्ये मुस्कान घटनाका मुख्य नाइके हुन् ।
सो घटनामा संलग्न केराबारी–७ का २२ वर्षीय विशाल लिम्बू यसअघि नै पक्राउ परिसकेका छन् । दुई लाख रुपैयाँ धरौटी बुझाउन नसक्दा अदालतको आदेशबाट उनलाई पूर्पक्षका लागि थुनामा पठाइएको छ ।
मादक पदार्थ सेवन गरेर पुगेको मुस्कान नेतृत्वको समूहले केराबारी–७ नर्कटेस्थित भागीमान लिम्बूको घरमा गत फागुन १५ गते बिहान ३ बजेतिर आक्रमण गरेको थियो ।
भगीमानकी छोरी २३ वर्षीया सम्झना लिम्बू र नुवाकोट घर भएका सुदीप राईबीचको बिहेको कार्यक्रम समापन भइसकेपछि घरेलु हतियार खुकुरी, भाला, रड, दाउरालगायतले आक्रमण गरेका थिए ।
Discussion about this post