इटहरी : इटहरीबाट पोखरा गएका एक जोडीले एउटै पासोमा आत्महत्या गरेका छन् । पोखरा लेकसाइडको होटलमा तीन दिनदेखि बस्दै आएका इटहरीका एक जोडीले एउटै पासो लगाएर आत्महत्या गरेका हुन् ।
होटलमा उनीहरुले आँफूहरु एउटै परिवार रहेको र ठेगाना सुनसरी भनेर उल्लेख गरेका थिए ।
होटलमा बसेका उनीहरु केहीबेर घुम्न भन्दै हाँसीखुशी नै निस्केको होटल संचालकले जनाएका छन् । उनीहरुले चिप्लेढुंगामा अर्को एक जना साथी रहेको र उनको विवाहका लागि आँफूहरु आएको बताएका थिए । होटलको सीसीटीभीमा हेर्दा उनीहरु खुसी नै देखिन्छन् ।
घुम्न भन्दै निस्किएका उनीहरुलाई होटल सञ्चालकले राति बजेसम्म कुरेर बसेको भएपनि त्यसदिन नआएको जिल्ला प्रहरी कार्यालय कास्कीका प्रहरी प्रवक्ता डीएसपी सुबास हमालले जानकारी दिए ।
हमालका अनुसार इटहरी उपमहानगरपालिका ५ बस्ने शिलेश्वर भट्टराई र दीपा खनाल हराएकाले परिवारले खोजी गरिरहेका थिए ।
होटलमा आफ्नो नाम किरण भट्टराई र ठेगाना सुनसरी उल्लेख गरेका ती युवा सोमबार राति साढे नौ बजेतिर युवतिसंगै होटलबाट बाहिरिएको सीसी टिभी फुटेजमा देखिएको डीएसपी हमालले बताए ।
उनीहरु बुलौदी नजिकैको जंगलमा कल्छेको रुखमा झुन्डिएको अवस्थामा मंगलबार विहान मात्र फेला परेको प्रहरीले जनाएको छ । घटना के कारणले भएको भन्नेबारेमा अनुसन्धान भइरहेको जिल्ला प्रहरी कास्कीले जनाएको छ ।
Discussion about this post