इटहरी : प्रदेश १ का संसदीय दलका नेता एवं नेपाली कांग्रेस सुनसरीका सभापति राजीव कोइरालाले १३२ औँ अन्तर्राष्ट्रिय श्रमिक दिवसको अवसरमा श्रमिकहरुमा शुभकामना व्यक्त गरेका छन्।
श्रमिक दिवसको अवसरमा शुभकामना दिदैँ संसदीय दलका नेता कोइरालाले कोभिड–१९ को चपेटामा परेका सम्पूर्ण श्रमजीवीको जीवनको सुरक्षा र श्रमिकको अधिकारको रक्षाका लागि सरकारले ठोस कदम चाल्न आग्रह गरेका हुन्।
उनले भने, ‘कोभिडको महामारीले हाम्रा सबै श्रमिक, मजदुरहरु असाध्यै कठिन अवस्थामा छन्। काम धन्धा बन्द छ। महामारीको चपेटामा छन्। उनीहरुका लागि प्रदेश सरकार र केन्द्र सरकारले राहत प्याकेज तत्काल घोषणा गर्नुपर्छ।’
कोरोना महामारीको कठिन परिस्थितिमा सरकारले मजदुर वर्गका लागि सरकारले विशेष राहतका कार्यक्रम ल्याउनुपर्ने बताउँदै सरोकारवाला सबैले श्रमिकको हितका लागि गम्भीरतापूर्वक सोच्न र श्रमिकमैत्री भएर काम गर्न समेत आग्रह गरे।
श्रमिकहरु समाज र राष्ट्रको आर्थिक मेरुदण्ड भएको बताउँदै नेता कोइरालाले सात सालको क्रान्ति देखि अहिले सम्म नेपालका हरेक राजनीतिक आन्दोलनमा श्रमिकहरु अग्रपंतिमा उभिएकाले अहिले सम्मका सबै परिवर्तनहरु सम्भव भएको बताए।
सम्पूर्ण श्रमजीवीलाई एकताको सूत्रमा बाँध्न यस दिवसले सहयोग पुग्ने विश्वास व्यक्त गर्दै कोइरालाले श्रमिक वर्गको हितका लागि सरकारले ठोस कदम चाल्नुपर्नेमा जोड दिएका छन्।
‘नेपालमा परिवर्तनका नायक र परिश्रमका पर्याय मजदुरहरु प्रति आज अन्तराष्ट्रिय मजदुर दिवसको उपलक्ष्यमा सम्मान व्यक्त गर्दै शुभकामना व्यक्त गर्दछु’, उनले भने ।
आठ घण्टा काम, आठ घण्टा मनोरञ्जन र आठ घण्टा आराम’ सन्देशसहित सुरु भएको मजदुर आन्दोलनको सम्झनामा विश्वभर अन्तर्राष्ट्रिय श्रमिक दिवस मनाइँदैछ ।
Discussion about this post