इटहरी : बर्खायाम सुरु भएसँगै इटहरीमा सर्पदंशका बिरामी बढेका छन् । इटहरीस्थित पूर्वी पृतना हेडक्वाटर (ब्यारेक) मा रहेको सामुदायिक सर्पदंश उपचार केन्द्रमा सर्पले टोकेका बिरामीहरुको संख्या बढेको हो ।
सामुदायिक सर्पदंश उपचार केन्द्रका अध्यक्ष दिवस पोखरेलका अनुसार प्रदेश १ का सुनसरी, मोरङ, झापा तथा प्रदेश २ का सप्तरी, सिरहा लगायत जिल्लाबाट सर्पले टोकेका बिरामीको अहिले भीड लाग्न थालेको छ । ‘हामीले वैशाख महिनामा मात्रै ८७ जना सर्पदंशका बिरामीको उपचार गरेका छौँ,’ पोखरेलले टाकुरासँग भने, ‘कोभिडको समयमा यो संख्या निकै ठूलो हो, अन्य समयमा पनि यत्तिकै मात्रामा सर्पदंशका बिरामी हुन्थे, अहिलेको अवस्थामा सर्पदंशका बिरामी बढेका छन् ।’
उनका अनुसार उपचार केन्द्रमा वैशाख महिनामा मात्रै ८७ जना सर्पदंशका बिरामीको उपचार गरिएको छ, यो निकै ठूलो संंख्या हो । अन्य अस्पतालले जुनसुकै बिरामीको जाँच गर्नपनि पीसीआर परीक्षण अनिवार्य गरेको तथा सर्पदंशका बिरामीको भर्ना नै नलिएको समयमा यस उपचार केन्द्रमा भने सर्पदंशका बिरामीलाई पीसीआर नै नगरी उपचार गर्नुपर्ने बाध्यता रहेको पोखरेलले बताए ।
उनले भने, ‘बाहिर बिरामी जाँदा अनिवार्य पीसीआर परीक्षण गर्ने गरेको छ, सर्पले टोकेका बिरामीलाई भर्ना नै नलिने पनि गरेको छ, हामीले पीसीआर नै नगरी उपचार गरिरहेका छौँ ।’ सर्पले टोकेका बिरामी जटिल अवस्थामा रहने भएकाले पीसीआर नै नगरी उपचार गर्न बाध्य रहेको पोखरेलले बताए ।
प्रदेश १ मा सबैभन्दा बढी मोरङ, झापा र सुनसरीमा कोरोना संक्रमितको संख्या बढ्दो छ । तर, त्यहीँबाट सर्पदंशका बिरामी धेरै संख्यामा आएकाले उपचार गर्न पनि जोखिम रहेको बताउँदै उनले भने, ‘अहिले १२ वटा मात्रै बेड छ, बिरामीको नन पोइजन वा पोइजन पहिचान गरेर उपचार गर्नुपर्ने हुन्छ, कम्तिमा पनि २४ घण्टा राखेर उपचार गर्दै आएका छौँ ।’
बेड संख्या थोरै भएपनि बिरामी जति आएपनि उपचारमा कुनै सम्झौता नहुने पोखरेलले बताए ।
स्थानीय नागरिक र नेपाली सेनाको समन्वयमा ०६९ सालमा स्थापना भएको उपचार केन्द्रमा हालसम्म १३ हजार भन्दा बढी बिरामीले उपचार गरिसकेका छन् । ‘नेपाली सेनाले उपचार गर्ने र उपचारमा हामीले आवश्यक सामाग्री उपलब्ध गराउनेगरी सम्झौता भएको छ,’ पोखरेलले भने, ‘प्रदेश १ र २ का बिभिन्न जिल्लाबाट आएका बिरामीहरुले सफल उपचार पाइरहेका छन् ।’
सर्पदंशका बिरामीलाई उपचार गर्न त्रास रहेपनि उपचार गरिरहेका उनले बताए । ‘सर्पका बिरामीको समयमा उपचार भएन भने मृत्यु हुनसक्छ, उपचार गरौँ भने आफैँ संक्रमित भइन्छ भन्ने त्रास पनि छ ।’ उनले भने ।
उपचार केन्द्रमा हाल सैनिक अस्पताल इटहरीका प्रमुख, सहायक रथी डा.भरत बहादुर भण्डारी लगायतको टिमले हाल सर्पदंशका बिरामीको उपचार गर्दै आएको छ ।
Discussion about this post