इटहरी : इटहरीमा औषधीको नाम नै केरमेट गरेर बिक्री गरेको पाइएपछि तीनवटा पसल शिल गरिएको छ ।
एक वर्षभन्दा कम उमेर समूहका शिशुलाई खुवाइने ‘डि थ्रि’ नामक औषधीको नाम नै केरमेट गरेर बिक्री गरेको पाइएपछि बुधबार इटहरीका तीनवटा पसल शिल गरिएको हो ।
इटहरी उपमहानगरपालिकाले बुधबार बजार अनुगमनका क्रममा केरमेट गरेर औषधी बिक्री गरेको आरोपमा तीन औषधी पसल शिल गरेको हो ।
इटहरी उपमहानगरपालिकाका कर शाखा प्रमुख नवीन भट्टराईका अनुसार सामुदायिक अस्पताल इटहरी, कलश फार्मेशी र एरभ मेडिकोस् एण्ड सप्लायर्स शिल गरिएको हो । उक्त औषधी शिशुलाई खुवाउँदा स्वास्थ्यमा नकरात्मक असर देखिन सक्ने भएकाले अनुगमन गरिएको उनले बताए ।
यसैबीच औषधी पसल शिल भएपछि व्यवसायीहरुले आपत्ति जनाएका छन् । बुधबार नै एक विज्ञप्ति प्रकाशित गरी औषधी व्यवसायीहरुले आपत्ति जनाएका हुन् ।
‘औषधी व्यवस्था विभागको प्रतिनिधि बिना नै पूर्वाग्रह रुपमा अनुगमनको नाममा पसल बन्द गरिनुको प्रतिकार गर्दछौँ,’ विज्ञप्तिमा भनिएको छ, ‘इटहरीका औषधी व्यवसायीको बदनाम गराउने उदेश्यले प्रतिनिधि बिना नै अनुगमन गरिनु आश्चर्यजनक छ ।’
औषधी व्यवस्था विभागले अनुगमन गर्नुपर्ने र जथाभावी भए कारबाही भोग्न तयार रहेको व्यवसायीहरुको भनाइ छ ।
Discussion about this post