धरान : धरान वडा नं. १७ स्थित अजम्बर मार्गदेखि बेलगाछी लाइनसम्मको सडक कालोपत्रे भएको छ ।
सडक उपभोक्ता समितिका सचिव उमेश राईका अनुसार करिब ४ सय ५० मिटर सडकको कालोपत्रे सम्पन्न भएको हो । बिहीबार धरान उपमहानगरका मेयर तिलक राई र वडा नं. १७ का वडाधयक्ष मनोज भट्टराईले संयूक्त रुपमा कालोपत्रे सडकको उद्घाटन गरेका छन् ।
उक्त सडकमा ४८ लाख ३५ हजार ३ सय ७४ रुपैयाँको लागतमा कालोपत्रे गर्ने कार्य सम्पन्न गरिएको उपभोक्ता समितिका सचिव राईले जानकारी दिए । मेयर कोष, उपमहानगरपालिका, १७ नं. वडा कार्यालय र स्थानिय उपभोक्ताबाट बजेट संकलन गरेर उक्त सडकको कालोपत्रे निर्माण सम्पन्न गरिएको हो ।
उपभोक्ता समितिका सचिव राईका अनुसार सडक आसपासमा रहेका विद्युतको ट्रान्सफर्मर सार्ने, विद्युतको पोल फेर्नुका साथै स्थानीयले खानेपानीको पाइपलाईन समेत पैसा उठाएर सारेका छन् । मेयर राईले धरान उपमहानगरपालिकाले लागत साझेदारीमा निर्माण गरेको बाटोहरु धेरै संख्यामा पुगिसकेको बताए ।
राईले भने, ‘उपभोक्ताबीचमै पदाधिकारीहरु ठेकेदारको रुपमा रहेर आफ्नो निर्माणलाई सम्झौता गर्ने, गुणस्तरहीन सामग्री प्रयोग गर्ने प्रवृति बढेको छ, यस्तो प्रवृतिले गर्दा राज्य र जनताले नोक्सान बेहोर्नुपरेको छ ।’
पछिल्लो समय धरानमा उपभोक्ताहरु ठेकेदारको रुपमा परिणत भईरहेको बताउँदै मेयर राईले यसले उपमहानगरपालिकाको लागत साझेदारीको काममा असर गरिरहेको धारणा व्यक्त गरे ।
मेयर राईले अजम्बर मार्ग र बेलगाछी लाइनमा अत्यन्तै राम्रो काम भएको भन्दै उपभोक्ता समितिको प्रशंसा गरेका छन् । ‘यहाँको उपभोक्ताहरुले अत्यन्तै राम्रो काम गर्नुभएको छ, यसै कारण पनि धरानको साख जोगाएको छ’ मेयर राईले भने ।
Discussion about this post