धरान : धरानमा खोप कार्यक्रमलाई व्यवस्थित गर्ने निर्णय भएको छ । मेयर तिलक राईको अध्यक्षतामा शुक्रबार कोरोना विरुद्धको खोप अभियान सम्बन्धमा धरान उपमहानगरपालिकामा बसेको सर्वदलीय बैठकले खोप कार्यक्रमलाई व्यवस्थित गर्ने निर्णय गरेको हो ।
धरानमा गएको सोमबार, मंगलबार र बुधबार तीन दिन चाईनिज भेरोसेल खोपको पहिलो मात्रा लगाइएको थियो । यो खोप ५५ बर्ष उमेर भन्दा माथि र विभिन्न लक्षित समूहलाई लगाइएको थियो । तीन दिनमा धरानमा ११ हजार बढीले खोपको पहिलो मात्रा लगाएका थिए ।
सर्वदलीय बैठकले आगामी खोप कार्यक्रमलाई सरल र सहज बनाउने निर्णय गरेको छ । ७ वटै खोप केन्द्रहरुमा राजनीतिक दलहरुबाट समेत अनुगमनका लागि १/१ जना प्रतिनिधि पठाउने, ७ वटै खोप केन्द्रहरुमा सम्बन्धित वडाको १/१ जना जनप्रतिनिधि रहने समेत व्यवस्था गर्ने निर्णय गरेको छ ।
खोप केन्द्रहरुमा लक्षित समूहका वडामा अलगअलग लाईन लगाएर खोप लगाईने व्यवस्था गर्ने निर्णय गरेको छ ।
यस्तै, खोपलाई व्यवस्थित गर्न २० वटै वडाका वडाध्यक्षहरुकोे अध्यक्षतामा राजनीतिक दलको प्रतिनिधिसहितको संयन्त्र बनाएर लक्षित समूहको तथ्यांक संकलन, खोप केन्द्र व्यवस्थापन गर्ने समेत निर्णय भएको छ । साथै, नगरपालिकालाई सुझाव दिने गरि वडा समितिलाई अनुरोध गर्ने पनि निर्णय गरेको छ ।
बैठकमा उपमेयर मञ्जु भण्डारी, नेपाली कांग्रेस, नेकपा एमाले, नेकपा माओवादी, जनता समाजवादी, राष्ट्रिय जनमुक्ति, संघीय लिम्बुवान, नेकपा माले, राप्रपा नेपालका नेताहरुको उपस्थिति रहेको थियो ।
Discussion about this post