इटहरी : पसलबाट सामान चोरी गरेको आरोप लगाएको रिसमा विराटनगरका ६९ वर्षीय ब्याट्री व्यवसायी लालजीप्रसाद गुप्ताको हत्या भएको प्रहरीको प्रारम्भिक अनुसन्धानबाट खुलेको छ ।
आरोपकै कारण आक्रोशित बनेका व्यक्तिले गुप्तालाई आफ्नै घरमा खाना खान बोलाएर हत्या गरेको र शव सुनसरीको केसेलिया खोलामा फालेको खुलेको हो ।
घटनामा संलग्न रहेको आरोपमा प्रहरीले तीन जनालाई पक्राउ गरेको छ । पक्राउ पर्नेमा विराटनगर महानगरपालिका–६ का ३६ वर्षीय अफरोज आलम (अब्जर मियाँ) र १३ तथा १६ वर्षका दुई बालक रहेका छन् । प्रहरीले उनीहरूलाई नियन्त्रणमा लिएर घटनाको थप अनुसन्धान गरिरहेको जनाएको छ ।
जिल्ला प्रहरी कार्यालय सुनसरीका प्रहरी उपरीक्षक पुष्पराज मल्लका अनुसार गुप्ता र मियाँबीच पसलबाट सामान चोरी गरेको विषयलाई लिएर विवाद हुँदै आएको थियो । विराटनगर–६ स्थित माता इलेक्ट्रिक वर्कसपबाट पानी तान्ने मोटरको तार चोरी गरेको आरोप गुप्ताले लगाएको विषयले विवाद चर्किएको प्रारम्भिक अनुसन्धानबाट खुलेको प्रहरीले जनाएको छ ।
प्रहरीका अनुसार चोरीको आरोपले आफ्नो मानहानी भएको ठानेका मियाँले गुप्ताप्रति आक्रोश राख्दै आएका थिए । सोही रिसका कारण हत्या गर्ने योजना बनाएको प्रहरीको प्रारम्भिक निष्कर्ष छ ।
अनुसन्धानमा खुलेअनुसार मियाँले गुप्तालाई आफ्नो घरमा खाना खान बोलाएका थिए । घर पुगेपछि दुवैले मदिरा सेवन गरेको र त्यसक्रममा मियाँले बियरको बोतलले गुप्ताको टाउकोमा प्रहार गरेका थिए । त्यसपछि फलामको रडले समेत प्रहार गरी हत्या गरेको प्रारम्भिक अनुसन्धानबाट खुलेको एसपी मल्लले जानकारी दिए ।
हत्या गरेपछि घटना लुकाउने उद्देश्यले शव बोरामा राखेर सिटी सफारीमा सुनसरीको बर्जु गाउँपालिका–२ भीमपुरस्थित केसेलिया खोलामा लगेर फालिएको प्रहरीको भनाइ छ ।
आइतबार बिहान स्थानीय बासिन्दाले खोलामा बोराभित्र शव देखेपछि प्रहरीलाई खबर गरेका थिए । सूचनापछि प्रहरी टोली घटनास्थल पुगेर अनुसन्धान थालेको थियो । शवको पहिचान गर्ने क्रममा मृतक विराटनगरमा लामो समयदेखि ब्याट्री व्यवसाय गर्दै आएका गुप्ता भएको पुष्टि भएको प्रहरीले जनाएको छ ।
भारतको उत्तर प्रदेशस्थित वाराणसी स्थायी घर भएका गुप्ता करिब ४० वर्षदेखि विराटनगरमा बस्दै आएका थिए । उनी विराटनगर महानगरपालिका–६ महावीर रोडमा ब्याट्री पसल सञ्चालन गर्दै आएका थिए । प्रहरीका अनुसार उनी विराटनगरमा एक्लै बस्दै आएका थिए ।
घटनाको अनुसन्धानका लागि कोशी प्रदेश प्रहरी कार्यालय विराटनगर तथा जिल्ला प्रहरी कार्यालय सुनसरी र मोरङको संयुक्त टोली परिचालन गरिएको थियो । प्रहरीले घटनास्थलबाट हत्या गर्न प्रयोग गरिएको भनिएको जिआई पाइप, मृतकले प्रयोग गर्ने मोबाइल र शव बेर्न प्रयोग गरिएको कार्पेटलगायत सामग्री बरामद गरेको जनाएको छ ।
पक्राउ परेका मियाँमाथि कर्तव्य ज्यानसम्बन्धी कसुरमा अनुसन्धान अघि बढाइएको छ । दुई बालकको घटनामा रहेको भूमिका र उनीहरूको संलग्नताबारे पनि अनुसन्धान भइरहेको प्रहरीले जनाएको छ ।
घटनामा संलग्न प्रत्येक व्यक्तिको भूमिका, हत्या हुनुको कारण र शव व्यवस्थापनमा उनीहरूको संलग्नताबारे थप अनुसन्धान जारी रहेको एसपी मल्लले बताए ।
Discussion about this post