इटहरी : विराटनगरमा ट्रकको ठक्करबाट एकको मृत्यु भएको छ । रंगेली–विराटनगर सडक खण्डअन्तर्गत विराटनगर महानगरपालिका ७ मा ट्रकको ठक्करबाट बिहीबार राति ५५ वर्षीय जनक बस्नेतको मृत्यु भएको हो।
पूर्वबाट उत्तरतर्फ मोडिदै गरेको ना ७ ख ३१३ नम्बरको ट्रकको ठक्करबाट सोही ठाउँका बस्नेतको मृत्यु भएको मोरङ प्रहरीका प्रवक्ता डिएसपी दीपक श्रेष्ठले जानकारी दिए । उनका अनुसार दुर्घटनामा परेर मृत्यु भएका विराटनगरका बस्नेतको शव बुझ्न आफन्त र परिवारका सदस्यले अस्वीकार गरेका छन् ।
दुर्घटनामा परेर गम्भीर घाइते भएका उनको उपचारका क्रममा विराटनगरको गोल्डेन अस्पतालमा राति ९ः३५ बजे मृत्यु भएको प्रहरीले जनाएको छ । प्रहरीले ट्रक चालक काभ्रे घर भएका २८ वर्षीय दीपक श्रेष्ठलाई नियन्त्रणमा लिइसकेको छ ।
ट्रकको ठक्करबाट देव्रे खुट्टा भाँचिएका बस्नेतको उपचारमा लापरबाही गरिएको भन्दै परिवारका सदस्य र आफन्तले मृतकको शव बुझ्न मानिरहेका छैनन् । शव अहिले गोल्डेन अस्पतालमै छ ।
घाइतेलाई आवश्यक पर्ने रगत डाक्टरले ढिलो मागेको र उपचारमा लापरबाही गरिएको भन्दै शव बुझ्न आफन्त र परिवारका सदस्यले नमानेका हुन् ।
Discussion about this post