तरहरा : इटहरी २० तरहरामा फोहर बोक्ने ट्याङ्करको ठक्करबाट एकजनाको मृत्यु भएको छ ।
तरहराको पानीपिया नजिकै आज (सोमबार) १२:१० बजे भएको दुर्घटनामा एकजनाको मृत्यु भएको हो भने एकजना घाइते भएका छन् ।
पूर्व क्षेत्रीय ट्राफिक प्रहरी कार्यालय इटहरीका प्रवक्ता डीएसपी सुमन तिम्सिनाका अनुसार धरानबाट इटहरीतर्फ आउँदै गरेको प्रदेश १–०२–०००१–६–८४४५ नम्बरको ट्याङ्करको ठक्करबाट विराटनगर महाननगरपालिका १४ का २० वर्षीय सफल राजवंशीको निधन भएको हो ।
दुर्घटनामा गम्भीर घाइते भएका उनको उपचारको क्रममा धरानस्थित वीपी कोइराला स्वास्थ्य विज्ञान प्रतिष्ठानमा मृत्यु भएको तिम्सिनाले जानकारी दिए ।
यस्तै, दुर्घटनाबाट सोही ठाउँका १८ वर्षीय अविनाश राजवंशी घाइते भएका छन् । उनको वीपी प्रतिष्ठानमा उपचार भइरहेको छ ।
ट्याङ्करका चालक इटहरी उपमहानगरपालिका ४ का २८ वर्षीय थुलमान राईलाई प्रहरी चौकी तरहराले पक्राउ गरेको छ ।
ट्याङ्करको ठक्करबाट मोटरसाइकल जलेर खरानी भएको प्रहरीले जनाएको छ । मोटरसाइकल जलेका कारण नम्बर प्लेट खुल्न बाँकी रहेको प्रहरीले जनाएको छ । दुर्घटना तीव्र गतिका कारण भएको हुनसक्ने प्रहरीको प्रारम्भिक अनुसन्धानबाट खुलेको छ ।
Discussion about this post