इटहरी (डेस्क) : सुनसरीको दुहवी र मोरङको विराटनगरमा भएका अलगअलग सवारी दुर्घटनामा परेर तीन जनाको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका अनुसार सुनसरीको दुहवी नगरपालिका १० स्थित भित्री सडक खण्डमा उत्तरबाट दक्षिणतर्फ जाँदै गरेको को १९ प ५०८ नम्बरको मोटरसाइकल अनियन्त्रित भएर बिजुलीको पोलमा ठोक्किर दुर्घटना हुँदा मोटरसाइकल चालक दुहवी ११ का ४५ वर्षीय ईश्वरचन माझी चौधरीको मृत्यु भएको छ ।
दुर्घटनामा परेर टाउकोमा गम्भीर चोट लागेका उनको उपचारका क्रममा मोरङको बूढीगङ्गास्थित विराट शिक्षण अस्पतालमा मृत्यु भएको प्रहरीले जनाएको छ । तीव्र गतिका कारण मोटरसाइकल दुर्घटनामा परेको प्रहरीले जनाएको छ ।
यस्तै, दुहवी ८ सोनापुरमा यात्रुबहाक बसको ठक्करबाट पैदल यात्रीको मृत्यु भएको छ । इटहरीबाट विराटनगरतर्फ जाँदै गरेको ना ५ ख ४५१३ नम्बरको बसले ठक्कर दिँदा पैदल यात्री मोरङको बेलबारी नगरपालिका बस्ने ७२ वर्षीय वृद्ध पवनलाल चौधरीको मृत्यु भएको हो ।
बसको ठक्करबाट गम्भीर घाइते भएका वृद्धको उपचारका क्रममा विराट शिक्षण अस्पतालमै मृत्यु भएको हो । दुर्घटनापछि प्रहरीले बस र चालक सप्तरीको सप्तकोसी नगरपालिका ५ का ४४ वर्षीय रोहितबहादुर विष्टलाई नियन्त्रणमा लिएर घटनाको अनुसन्धान थालेको छ ।
यस्तै, विराटनगर महानगरपालिका १४ भगवती टोलमा रोकेर राखेको सिटी सफारी दुर्घटना हुँदा एक बालकको मृत्यु भएको छ । प्रहरीका अनुसार घरनजिक रोकेर राखेको को १ ह ४३५० नम्बरको सफारीमा अमर महतोका अढाई बर्से छोरा अनिल महतो खेल्दै थिए ।
खेल्ने क्रममा आफैँ अगाडि बढेको सफारीले ९ महिने नाबालक सुनील महतोलाई ठक्कर दिएको थियो । सफारीको ठक्करबाट घाइते भएका सुनीलको उपचारका क्रममा न्यूरो अस्पताल विराटनगरमा मृत्यु भएको प्रहरीले जनाएको छ ।
मृत्यु भएका ९ महिने नाबालक अमरका छोरा एवम् अनिलका भाइ हुन् ।
सबै घटना शनिबार साँझ भएको प्रहरीले जनाएको छ । घटनाबारे थप अनुसन्धान अगाडि बढाएको प्रहरीले जनाएको छ ।
Discussion about this post