इटहरी : इटहरी उपमहानगरपालिका ६ का एक पुरुषलाई प्रहरीले बिष्फोटक पदार्थसहित पक्राउ गरेको छ ।
इलाका प्रहरी कार्यालय इटहरीका प्रहरी नायब उपरीक्षक (डीएसपी) अर्जुन केसीका अनुसार बिष्फोटक पदार्थसहित इटहरी ६ का २७ वर्षीय राजु साहलाई पक्राउ गरिएको हो ।
‘भारतबाट अबैध रूपमा बिष्फोटक जन्यपदार्थ पटका ओसारपसार गरी विक्री वितरण गर्दै गरेको भन्ने सूचनाका आधारमा हामीले पक्राउ गरेका हौँ,’ डीएसपी केसीले टाकुरासँग भने, ‘उनलाई इटहरी ४ आर्मी क्याम्प नजिकैबाट पक्राउ गरिएको हो ।’
प्रहरीका अनुसार शुक्रबार साँझ पक्राउ गरेपनि आइतबार अबेलामात्रै प्रहरीले सार्वजनिक गरेको हो ।
को ३५ प ८७६८ नम्बरको मोटरसाइकलमा दुईवटा सेतो प्लाष्टिकको बोरा लोड गरेको र मोटरसाइकल नजिकै छेउमा पहेलो प्लाष्टिकको बोरामा ४ बोरा र हरियो प्लाष्टिकको २ बोरामा प्याक गरी राखेको अवस्थामा मोटरसाइकलसहित इटहरी प्रहरीले साहलाई पक्राउ गरेको थियो ।
पटका ८ वटा प्लास्टिकको बोरामा जम्मा ७६ बण्डल (प्रति बण्डलमा ५० प्याकेटका दरले जम्मा ३,८००।– प्याकेट) रहेको प्रहरीले जनाएको छ । पक्राउ परेका उनलाई सुनसरी जिल्ला अदालतबाट मुलुकी अपराध संहिता २०७४ अन्तर्गत विष्फोटक पदार्थ सम्बन्धि कसुरमा १० दिनको म्याद थप अनुसन्धान गरी अनुसन्धान भइरहेको प्रहरीले जनाएको छ ।
चाडपर्वहरू नजिकिदैँ गएको समयमा बिष्फोटक पदार्थहरूको कारोबार बढ्दै गएकाले आफूहरू गम्भीर भएर अनुसन्धान अगाडि बढाएको डीएसपी केसीले बताए । बिष्फोटक पदार्थको कारोबार भएको भए प्रहरीलाई जानकारी गराउन समेत प्रहरीले अपिल गरेको छ ।
Discussion about this post