तरहरा : इटहरी–धरान सडकखण्डमा पर्ने तरहराको चारकोसेमा कोभिड स्मृति पार्कको स्थापना गरिएको छ । तरहरा जेसीजले निर्माण गरेको कोभिड स्मृति पार्कको बिहीबार एक कार्यक्रमकाबीच उद्घाटन गरिएको हो ।
इटहरी २ को शान्तिनगर सामुदायिक बनमा पर्ने चारकोसेमा निर्माण गरिएको पार्ककको शान्तिनगर सामुदायिक बनका अध्यक्ष केशव मिरिङचिङ मगरले उद्घाटन गरे ।
उद्घाटनपछि कार्यक्रममा सम्बोधन गर्दै मगरले उक्त पार्कको सहि सदुपयोग हुनुपर्ने बताए । ‘जल, जडिबुटी, बन्यजन्तु बनमै भएपनि तिनीहरूको संरक्षण भएको पाइदैंन,’ उनले भने, ‘कोभिडबाट मृत्यु भएका मानिसको स्मृतिमा तयार पारिएको चौतारोमा मानिसलाई थकाई मार्ने माध्यम पनि हुन्छ ।’
उनले उक्त पार्क आसपास वर र पीपलका रूख रोप्न आवश्यक रहेको बताउँदै जेसीजले गरेको उक्त कार्यक्रम कोशेढुंगो साबित हुने तर्क गरे ।
तरहरा जेसीजको सप्ताह कार्यक्रमको दोश्रो दिन कोभिड स्मृति पार्कको उद्घाटन गरिएको अध्यक्ष सन्तोष रेग्मीले बताए ।
उनले भने, ‘दीगो रूपमा पर्यटन प्रबर्द्धनसहित यस क्षेत्रलाई आकर्षक गन्तव्य बनाउनका लागि पनि हामीले यहाँ पार्क स्थापना गरेका हौँ ।’ उनका अनुसार कोभिडबाट मृत्यु भएका मानिसहरूको दाहसंस्कार गरिएको ठाउँमा उक्त पार्क निर्माण गरिएको छ ।
कार्यक्रममा प्राकृतिक द्वन्द रुपान्तरण केन्द्रका संयोजक राजन राईले महत्त्वपूर्ण कामको थालनी गर्नुले भोलिका दिनमा इतिहास बन्ने बताए । पूर्वको एउटा पर्यटकीय क्षेत्र बन्न सक्ने संकेत गर्दै उनले भने, ‘पर्यटन प्रबर्द्धनका लागि राज्यले लगानी गर्नुपर्छ, वातावरण क्षेत्रमा जेसीजले काम गर्नु सकारात्मक हो ।’
जेसीजका पूर्व अध्यक्ष विकास गिरीले कोभिडले थिलथिलो बनेको समयमा कोभिड पार्क स्थापना हुनु सराहनीय रहेको बताए । ‘हिजोको दिनमा कोभिडबाट मृत्यु भएका मानिसको गाउँमै जान डराउने समय थियो,’ उनले भने, ‘आफन्त नै गुमाएका मानिसहरू पनि हिजो डरले यो ठाउँ आउनुभएन होला, तर आज मायाले गर्दा यहाँ आउँनुहुन्छ ।’
कार्यक्रममा नेपाली कांग्रेस वडा नं. २० का सभापति अर्जुन बस्नेत, विवेकशील साझा पार्टी इटहरी २० का संयोजक ध्रुव भण्डारी लगायतले बोल्दै सकारात्मक काम रहेको भन्दै प्रशंसा गरे । कार्यक्रम सुरज गुरुङको संयोजकत्वमा सम्पन्न भएको थियो ।
जेसीज सप्ताह अन्र्तगत पहिलो दिन बुधबार (हिजो) साइक्लिङ गरिएको थियो । यस्तै, शनिबार बिहीबारेमा रक्तदान, आइतबार स्लो बाइक रेस प्रतियोगिता, सोमबार मैत्रीपूर्ण फुटसल र बुधबार सप्ताह समापन तथा मनोरञ्जनात्मक कार्यक्रमको आयोजना गरिनेछ ।
यो पनि – तरहरामा जेसीज सप्ताह सुरु, पहिलो दिन साइक्लिङ (तस्वीरहरूसहित)
Discussion about this post