तीनदिनदेखि नउठेको फोहर लिबरल सोसाइटीको नेतृत्वमा उठ्यो, तरहरा बजार सरसफाई (तस्वीरहरूसहित)

तरहरा : शनिबार बिहान । एक–दुई गर्दै दर्जनौँ युुवाहरू भेला भए । इटहरी उपमहानगरपालिका २० तरहराका प्रतिष्ठित व्यक्तिहरूसहित स्कुल, क्याम्पस पढ्ने उमेरका किशोरहरू पनि साथमा थिए । भेला भएको केहीबेरमै बजारका मानिसहरूको ध्यान केन्द्रित भयो ।

भेला भएका उनीहरूमध्ये कसैले झाडु, कसैले कुचो त कसैले फोहर उठाउने डस्बिन बोकेर बजारमा रहेको फोहर सफाई गर्न थाले ।

तीनदिन अघिदेखि बजारमा फोहर भएपनि उठेको थिएन । सोही फोहरलाई सफाई गर्नका लागि यहाँको लिरबल सोसाइटीले नेतृत्व गरेको छ । सोसाइटीका अध्यक्ष सुबेक्छु देवानका अनुसार चाडपर्वको बेलामा बाहिरी जिल्लाबाट आउने मानिसहरूलाई तरहरा फोहरको परिचय भएको भान नहोस् भन्नका लागि सफाई गरिएको हो ।

‘बाहिरबाट चेलीहरू तरहरामा माइत आउँदा तरहरा कस्तो फोहर रहेछ भन्ने नहोस् भन्नका लागि हामीले सफाइ गरेका हौं,’ उनले भने, ‘चेलीले माइती पुज्ने दिन छ्या तरहरा भन्ने नहोस्, त्यही उदेश्यले हामीले सकारात्मक सन्देश दिनका लागि पनि यो काम गरेका हौं ।’

उनका अनुसार लिबरलले दुई वर्षअघि हरेक साताको शनिबार विभिन्न ठाउँमा सरसफाईको अभियान नै चलाएको थियो । तरहरामा सरसफाई अभियान सञ्चालन गरेको सोसाइटीले कोरोना महामारीका बेला पनि संक्रमितका घरमै गएर स्वास्थ्य सेवासहित सेनिटाइज अभियान सञ्चालन गरेको थियो ।

शनिबार (आज) तिहारको अवसरमा लिबरलसहित लायन्स क्लब अफ तरहरा, तरहरा साइक्लिङ लगायतका संस्था पनि सहभागी थिए । लायन्स तरहराका अध्यक्ष सन्तोष श्रेष्ठले लिबरलले गरेको सकारात्मक काममा आफूहरूले पनि सहभागी जनाएको बताए ।

‘तरहरामा भएको प्रशंसनीय काममा हामी मनबाटै खुशी भएर साथ दिएका हौं ।’ उनले भने ।

तरहरा साइक्लिङका अध्यक्ष शिवु रुम्दाली राईले पछिल्लो समय साइक्लिङमार्फत जनचेतना फैलाउने बताए । स्वास्थ्य सबल बन्नका लागि सरसफाईसँगै साइक्लिङ आवश्यक रहने उनको तर्क छ ।

‘मानिसको स्वास्थ्य सफल बन्नका लागि सरसफाई आवश्यक हुन्छ,’ उनले भने, ‘सरसफाई सँगै साइक्लिङ गरियो भने फुर्तिलो शरीर बन्छ, त्यसैले मानिस खुशी पनि बन्छन् ।’ उनले तरहरामा आफूहरूले सकारात्मक कामका निम्ति साथ दिने बताए ।