झापा : झापामा बोलेरो गाडीको ठक्करबाट मोटरसाइकल चालकको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका अनुसार पश्चिमतर्फ जाँदै गरेको मे ९ प ६५१९ नम्बरको मोटरसाइकललाई मे १ ज १४०५ नम्बरको बोलेरोले पछाडिबाट ठक्कर दिदाँ गम्भीर घाइते भएका मोटरसाइकल चालक कनकाई ६ का ६० वर्षीय कविराज बोहोराको मृत्यु भएको हो ।
पूर्व–पश्चिम लोकमार्गअन्तर्गत झापाको कनकाई नगरपालिका ३ मा दुर्घटना भएको हो । दुर्घटनामा परेर प्रहरीसहित बोलेरोमा सवार चार जना घाइते भएका छन् ।
प्रहरीका अनुसार दुर्घटनामा बोलेरोमा सवार सङ्खुवासभाको धर्मदेवी नगरपालिका ६ का ३८ वर्षीय गणेशबहादुर राई, इलामको सन्दकपुर गाउँपालिका १ की २८ वर्षीया सङ्गीता राई, २६ वर्षीया ममता राई र झापाको गौरादह नगरपालिका १ की ४१ वर्षीया बिमला लिम्बू घाइते भएका छन् ।
घाइतेमध्ये गणेशबहादुर नेपाल प्रहरीका हवल्दार हुन् । उनी उदयपुरको लालपत्ता प्रहरी चौकीमा कार्यरत छन् ।
दुर्घटनापछि बोलेरो चालक इलामको देउमाई नगरपालिका १ का २७ वर्षीय निमेश गुरुङलाई नियन्त्रणमा लिएर घटनाको अनुसन्धान सुरु गरिएको प्रहरीले जनाएको छ ।
Discussion about this post