इटहरी : इटहरी उपमहानगरपालिकाका विषय विज्ञ सल्लाहकार प्रा.डा. बद्रीविशाल पोखरेलले राजीनामा दिएका छन् ।
इटहरीको बहुआयामिक विकास निर्माणमा सहयोग, सल्लाह र सुझावका लागि भन्दै उनलाई उपमहानगरले विषय विज्ञका रूपमा सल्लाहकारमा मनोनित गरेको थियो ।
राजीनामा दिदैं पोखरेलले भनेका छन्, ‘दिइएको महत्वपूर्ण सुझावहरूलाई प्रमुख र उपप्रमुखद्वारा बेवास्ता गरियो ।’ इटहरी सरकारले भाषा, कला, साहित्य र संस्कृतिका विषयमा संविधानतः गर्नुपर्ने काममा बेपर्वाह गर्दैै अपमान समेत गरेको डा. पोखरेलले बताए ।
‘उपमेयर लक्ष्मी गौतमकै निर्देशनमा पालिकामा भएका पुस्तकालयका पुस्तकहरू इटहरीका विभिन्न साहित्यिक प्रतिष्ठानमा वितरण गरेर पुस्तकालय बिहीन इटहरी बनाउन खोजेपछि स्रष्टाहरूले दबाब दिएपछि पहिलेको समृद्व पुस्तकालय खुम्चिएकै अवस्थामा भएपनि घिटघिटी हुँदै बाँचेको छ,’ राजीनामा पत्रमा पोखरेलले लेखेका छन्, ‘त्यसैले यस खालका चरम अबौद्विक र गैरसाहित्यिक चरित्र र चिन्तन भएका जनप्रतिनिधिका गैर जिम्मेवार गतिविधिबाट आजित भएर मैले सल्लाहकार सदस्यबाट राजीनामा दिएको छु ।’
पालिकाबाट गरिएको चरम उपेक्षा र अपमान सह्य नभएको भन्दै आफूले राजीनामा दिएको उनले बताए । राजीनामा पत्रको सुरूमै डा. पोखरेलले सर्पहरू गीत, संगीत सुन्दै सुन्दैनन् भनेर लेखेका छन् ।
उनले यस्तै किसिमका चरित्र र चिन्तन बोकेका नेता र कार्यकर्तालाई बुइ बोक्ने नेता र पार्टीको भविष्यको हालतबारे आफू अनविज्ञ रहेको उदृत गर्दै चिन्तित रहेको बताएका छन् ।
Discussion about this post