तरहरा : इटहरी २० तरहरास्थित पानीपियामा बसको ठक्करबाट मोटरसाइकलमा सवार दुईजनाको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका अनुसार बिहीबार (हिजो) राति ७ः१५ बजे पानीपियास्थित चारकोसे झाडीमा दुर्घटना भएको हो ।
दक्षिणबाट उतरतर्फ जादै गरेको को २७ प २१९ नं को मोसालाई बिपरीत दिशाबाट आउदै गरेको प्र १–०–२–००१ ख ८१९६ नम्बरको बसले ठक्कर दिँदा मोटरसाइकलमा सवार दुईको मृत्यु भएको प्रहरीले जनाएको छ ।
मृत्यु हुनेमा संखुवासभा खाँदबारी नगरपालिका ७ बस्ने २२ वर्षीय अबि राई र मोरङको सुन्दरहरैँचा ५ बस्ने २७ वर्षीय सन्तोष राई रहेका छन् । दुर्घटनामा दुवैजना गम्भीर घाइते भइ उपचारको लागि धरानस्थित वीपी कोइराला स्वास्थ्य विज्ञान पठाएकोमा दुवैको उपचारको क्रममा मृत्यु भएको प्रहरीले जनाएको छ ।
दुईमध्ये को मोटरसाइकल चालक भन्ने पनि खुल्न बाँकी रहेको प्रहरीले जनाएको छ । प्रहरीको प्रारम्भिक अनुसन्धान अुनसार बसले पैदलयात्री जोगाउने क्रममा उक्त दुर्घटना भएको हो ।
प्रहरीले दुवै सवारी साधनसहित बस चालक इटहरी ४ बस्ने ४४ वर्षीय टीकाराम चौधरीलाई नियन्त्रणमा लिएर आवश्यक अनुसन्धान सुरु गरेको जनाएको छ ।
Discussion about this post