धरान : सुनसरीको रामधुनी ३ झुम्काका गजलकार रोमु अधिकारीको गजलसंग्रह ‘बरियो’ लोकार्पण गरिएको छ ।
धरानस्थित वडा नं. १३ को सभाहलमा शनिबार एक कार्यक्रमकाबीच गजलकार अधिकारीको गजलसंग्रहको लोकार्पण गरिएको हो ।
साहित्य कला संस्कृति प्रतिष्ठानले आयोजना गरेको कार्यक्रममा सुनसरी क्षेत्र नं. १ का सांसद जयकुमार राई, साहित्यकार दधिराज सुवेदी, धरान वडा नम्बर १३ का वडाध्यक्ष समेत रहेका प्रतिष्ठानका संरक्षक नेत्र काफ्ले, प्राध्यापक कविराज न्यौपाने, गजलकार देवी पन्थी, साहित्यकार ममता मृदुल, डियर कल्याण साहित्य प्रतिष्ठान इटहरीका अध्यक्ष विनोद विवश घिमिरे, आयोजक संस्थाका अध्यक्ष गोपाल श्रेष्ठ लगायतले संयुक्त रुपमा गजलसङ्ग्रहको लोकार्पण गरेका थिए ।
विमोचित कृतिका बारेमा गलकार मधु पोखरेलले समीक्षा गरेका थिए । कृतिमा गजलका सिद्धान्तलाई आत्मसात गर्दै शृंगारिकसहित समसामयिक विषयलाई उठाइएको उनले बताए । कार्यक्रममा कवि एवं पत्रकार मीनकुमार नवोदित, गजलकार लीला अनमोल, विनोद विवश, हेमन्त निरौला, दीपा वाग्ले, किरण चापागाईं, वसन्त विनोद लगायतले विमोचित कृतिभित्रका गजलहरू वाचन गरेका थिए ।
सङ्ग्रहमा १०१ वटा गजल सङ्ग्रहित रहेका छन् ।
यस्तै, कार्यक्रममा धनकुटाका कवि रमेशचन्द्र अधिकारी, नुवाकोटीकी सुमित्रा सुमी, मोरङका युवराज ठकुरी, सुनसरीका एकराज थापा, श्रीभवानी नेपाल, हिक्मत खड्का, मित्र गौतम उराठी, रोमा लम्साल लगायतलाई सम्मान समेत गरिएको थियो ।
Discussion about this post