धरान : धरान उपमहानगरपालिका क्षेत्रभित्र रहेका ऋण तथा बचत सहकारी संस्थाहरुलाई व्यवस्थित बनाउनका लागि उपमहानगरपालिकाले नियमन गर्ने भएको छ ।
सहकारीको मान्यता अनुसार धरानमा वार्षिक साधारणसभा नभएका कारण वेथिति मौल्याएको छ । केही सहकारीहरूको ठेगाना नभएको तर, नगरपालिकामा दर्ता भएको सहकारी छन्।
सहकारीको मूल्य, मान्यता र सिद्धान्त अनुसार धरानका सहकारीलाई व्यवस्थित बनाउनका लागि नियमन गर्न लागिएको बिहीबार बोधिचित्त बचत तथा ऋण सहकारी संस्था लि.ले आयोजना गरेको कार्यक्रममा उपमहानगरपालिकाले जनाएको हो ।
कार्यक्रमका प्रमुख अतिथि समेत रहेका मेयर तिलक राईले पछिल्लो समय धरानमा सहकारी संस्थाहरूले आर्थिक अनियमितता गरेको घटनाहरु बाहिरिन थालेको बताउँदै यसलाई बेलैमा व्यवस्थित गर्न नसके भोलि गएर ठूलो समस्या उत्पन्न गर्नसक्ने बताए ।
मेयर राईले भने, ‘अहिले सहकारीहरू कसरी डुबिरहेको छ ? किन डुबिरहेको छ ? तपाईहरूको पनि पैसा परेको होला, पछि तपाईहरू नै निवेदन लिएर नगरपालिकामा आउनुहुन्छ, मेरो पैसा तसहकारीमा राखेको थिए, उठाईदिनुपर्यो भनेर । त्यतिबेला हामिले के गर्ने ?’
गरीब जनताको पैसा उठाएर व्यक्तिगत रूपमा लगानी गरिरहेका कारण यस्तो समस्या सिर्जना भएको मेयर राईको भनाइ थियो । मेयर राईले राजनीतिक दलहरूले पनि धरानमा सहकारी थप्न नहुने सुझाव दिए ।
उपमहानगरपालिकामा प्रत्येक हप्ता सहकारीले पैसा खाइदियो भनेर निवेदन परिरहेको मेयर राईले बताउँदै भने, ‘मैले जम्मा गरेको म्याद पुग्यो, त्यो सहकारीको सञ्चालक भाग्यो, पास बुक छ, पैसा दिँदैन भनेर धेरै वटा निवेदन परेको छ । यत्रो वेथिति भइरहेको छ । नयाँ सहकारी थप्ने हो कि, नथप्ने हो कि भनेर छलफल पनि भइरहेको छ, यस विषयमा उपमहानगरपालिका गम्भीर छ ।’
सहकारी शाखा प्रमुख भक्तिराज शर्माका अनुसार उपमहानगरपालिकामा ८८ वटा सहकारी संस्थाले दर्ता गराएको तथ्यांक छ । सहकारीले करिब १९ करोड रुपैयाँ हिनामिना गरेको उपमहानगरपालिकामा निवेदन परेको उनले बताए ।
Discussion about this post