इटहरी : इटहरी उपमहानगरपालिकाका मेयर द्वारिकलाल चौधरीले पत्रकारमाथि अपशब्द प्रयोग गरेका छन् ।
प्रदेशपोर्टल डट कम मा आएको समाचारको विषयलाई लिएर मेयर चौधरीले सो अनलाइनका प्रबन्ध निर्देशक प्रेम बास्तोलामाथि सामाजिक सञ्जालमा अपशब्द प्रयोग गरेका हुन् ।
विभिन्न समयमा पत्रकारलाई पटकपटक आलोचनात्मक टिप्पणी गर्दै आएका उनले यसपटक सामाजिक सञ्जालमै पत्रकार बास्तोलालाई ‘चुतियाहरू’ भन्दै अपशब्द प्रयोग गरेर गाली, बेइज्जती गरेका हुन् ।
पत्रकार प्रकाश बन्जाराले लेखेको ‘इटहरीका चामल चोरहरूसँग जनताको अपेक्षा र स्थानीय तहको निर्वाचन’ शीर्षकको समाचारमा उनले सामाजिक सञ्जालमार्फत आपत्ति जनाएका हुन् ।
सो समाचार सेयरको गर्दा पत्रकार बास्तोलामाथि मेयर चौधरीले ‘बास्तोला दूधले नुहाएको मान्छे हुन र ? चोरका खन्तीहरू, चुतियाहरू’ जस्ता शब्द प्रयोग गर्दै बेइज्जती गरेका हुन् ।
यसअघि पनि मेयर चौधरी विभिन्न विवादमा तानिएका छन् ।
यसैबीच नेपाल पत्रकार महासंघ सुनसरीले पत्रकार बास्तोलमाथि भएको अपशब्दप्रति आपत्ति जनाएको छ ।
महासंघका सचिव ध्रुव ढकालद्वारा जारी विज्ञप्तीमा समाचारमा चित्त नबुझे उजुर गर्ने निकाय हुँदाहुँदै पनि सामाजिक सञ्जालमा गाली, बेइज्जती गर्नु अशोभनीय भएकाले निन्दा गरिएको हो ।
यस्तै, समाजबादी प्रेस संगठन केन्द्रीय कार्यालयले पनि घटनाको निन्दा गरेको छ ।
‘संचार माध्यममा व्यक्तिको विचार प्रकाशन, प्रसारण गर्न पाउने संविधानप्रदत्त मौलिक हकलाई चुनौती दिने काम जनप्रतिनिधिबाटै हुनु दुखद् हो,’ महासचिव भुपराज खड्काद्वारा जारी विज्ञप्तीमा भनिएको छ, ‘उक्त विषयमा चित्त नबुझे कानुनी उपाय खोज्ने प्रशस्त मार्ग हुँदाहुँदै पनि सार्वजनिक पद धारण गरेका उपमहानगरका मेयरसमेत रहेका व्यक्ति चौधरीले यसरी एउटा पत्रकार, लेखकमाथि गरेको असभ्य र धम्कीपूर्ण कार्यप्रति संगठन खेद प्रकट गर्दछ ।’
Discussion about this post