इटहरी : इटहरीमा सार्वजनिक बसभित्रै अभद्र व्यवहार गर्ने एक पुरुषलाई प्रहरीले पक्राउ गरेको छ ।
इलाका प्रहरी कार्यालय इटहरीका अनुसार २४ वर्षीय युवतीलाई बसभित्रै अभद्र व्यवहार गर्ने पुरुषलाई पक्राउ गरिएको हो ।
डीएसपी खगेन्द्रबहादुर खड्काका अनुसार पक्राउ पर्नेमा विराटनगर महानगरपालिका ६ बस्ने ४३ वर्षीय मालबाबु सहनी रहेका छन् ।
‘दुवैजना धरानबाट इटहरीतर्फ आउँदैथिए, आउनेक्रममा महिलालाई हैरानी दिने, शरीर छुने जस्ता अभद्र व्यवहार गरेपछि पक्राउ गरेका हौँ,’ डीएसपी खड्काले टाकुरासँग भने, ‘पक्राउ परेका उनलाई जिल्ला अदालतबाट म्याद थप गरी आवश्यक अनुसन्धान तथा कारबाहीको प्रक्रिया अगाडि बढाएका छौँ ।’
उनका अनुसार मोरङको सुन्दरहरैँचा घर भएकी युवती धरानको भोटेपुलबाट को १ ख ७५४८ नम्बरको बसमा चढेकी थिइन् । ती पुरुष पनि सोही बसमा सवार थिए ।
बसमा भीड भएका कारण उभिइरहेकी उनलाई ती पुरुषले शरीर छुने, अभद्र व्यवहार गर्ने, गालीगलौज गर्ने जस्ता घटना भएको प्रहरीको अुनसन्धानबाट खुलेको छ ।
घटना फागुन ३ गते मंगलबार साँझको भएपनि प्रहरीले प्रारम्भिक अनुसन्धान गरेर बिहीबार साँझमात्रै सार्वजनिक गरेको हो ।
सहनीलाई तरहरा प्रहरी चौकीले तरहराबाट नियन्त्रणमा लिएको प्रहरीले जनाएको छ । घटनाबारे थप अनुसन्धान भइरहेको प्रहरीले जनाएको छ ।
Discussion about this post