इटहरी : इटहरीमा ठगीको आरोपमा लघुबित्तका कर्मचारीलाई प्रहरीले पक्राउ गरी सार्वजनिक गरेको छ ।
इलाका प्रहरी कार्यालय इटहरीका प्रहरी निरीक्षक केशवकुमार कटवालका अनुसार गत फागुन २२ गते इटहरी १३ मा रहेको महिला लघुवित्त वित्तीय संस्था लिमिटेड शाखा कार्यालयमा कार्यरत कर्मचारी रोशन कुमार माझीलाई नौ लाख ८० हजार रुपैँया ठगी गरेको आरोपमा पक्राउ गरिएको हो ।
मोरङ ग्रामथान गाउँपालिका वडा नं. १ लखनतरी बस्ने २४ २४ वर्षीय माझीलाई इटहरी १३ मा रहेको सनराइज बैँक लिमिटेड शाखा कार्यालयमा कार्यालयको कामको लागि रकम निकाल्न भनेर नौ लाख ८० हजार रुपैँयाको चेकबाट रकम निकालेर १९ हजार नौ सय ८० रुपैँया मात्र जम्मा गरेको र अरु रकम ठगी गरेको आरोपमा प्रहरीले पक्राउ गरिएको प्रहरी निरीक्षक कटवालले बताए ।
उनका अनुसार नौ लाख ९९ हजार नौ सय ८० नगद रकम लिइ ठगी गरी अपराधिक विश्वासघात गरी सम्पर्क बिहीन भएको अवस्थामा विराटनगर १५ बाट पक्राउ गरिएको हो ।
उनलाई नेपाल–भारत सीमाना नजिक रहेको मिस्टी गेष्ट हाउसको कोठा नं. १०४ मा मिति बुधबार साँझ पक्राउ गरेको प्रहरीले जनाएको छ ।
पक्राउ परेका उनीमाथि अपराधिक विश्वासघात मुद्धा शीर्षकमा आज (बिहीबार)सुनसरी जिल्ला अदालतवाट सातदिनको म्याद थप गरी अनुसन्धान भइरहेको प्रहरीले जनाएको छ ।
उनको साथबाट मोटो रकमसहित नागरिकता, राहदानी तथा मोबाइल बरामद गरिएको इटहरी प्रहरीले जनाएको छ ।
Discussion about this post