तरहरा : तरहरा जेसीजले अन्तराष्ट्रिय श्रमिक मजदुर दिवसको अवसर पारेर सफारी चालकहरूलाई सवारी चालक पोसाक वितरण गरिएको छ ।
आज (आइतबार) इटहरी २० तरहरामा एक कार्यक्रमको आयोजना गर्दै सवारी चालकहरूलाई पोसाक वितरण गरिएको हो । पूर्व क्षेत्रीय ट्राफिक प्रहरी कार्यालय इटहरीका प्रमुख (एसपी) वासुदेव खतिवडाको प्रमुख आतिथ्यतामा पोसाक वितरण गरिएको हो ।
कार्यक्रममा सफारी चालकमध्येका जेष्ठ नागरिक मणिराज राई र टंककुमारी राईलाई सम्मान गरियो । प्रमुख अतिथि एसपी खतिवडाले चालकको लापरबाहीका कारण दुर्घटना भइरहेको बताए ।
चालकको लापरबाहीका कारण एउटै घटनामा दर्जन बढीको ज्यान जाने गरेको उदाहरण दिँदै सचेत रहेर सवारी चलाउनुपर्ने उनले बताए ।
सफारीहरूलाई व्यवस्थापन गर्न आवश्यक रहेको बताउँदै उनले अहिले पार्किङको समस्याका कारण सवारीको चाप बढेका कारण पनि दुर्घटना हुने भएकाले सचेत रहन अपिल गरे ।
यहाँका एक सय बढी सफारी चालकहरूलाई पोसाक वितरण गरिएको तरहरा जेसीज वर्ष २०२२ का अध्यक्ष उमेश राईले बताए । उनका अनुसार मजदुरहरूलाई सकारात्मक मार्गनिर्देशन प्रदान गर्न उक्त कार्यक्रमको आयोजना गरिएको हो ।
कार्यक्रममा तरहरा जेसीजका पूर्व अध्यक्ष तथा इटहरी २० का वडाध्यक्ष मणिराम श्रेष्ठ, जेसीजका पूर्व अध्यक्ष चन्द्रकुमार गिरी, पूर्वाञ्चल टिपर व्यवसायी संघका अध्यक्ष शिव पोखरेल लगायतले बोलेका थिए ।
कार्यक्रम तरहरा जेसीजका जनसम्पर्क अधिकारी सुरज क्षेत्रीको संयोजकत्वमा सम्पन्न भएको हो ।
Discussion about this post