तरहरा : इटहरी उपमहानगरपालिका वडा नं. २० तरहरामा ‘प्रथम खार्साला नकआउट फुटबल प्रतियोगिता’ आयोजना गरिएको छ ।
खेलको सोमबार उद्घाटन भएको हो ।
प्रदेश १ का उद्योग, श्रम तथा रोजगारमन्त्री प्रकाशप्रताम हाङमाङले खेलको उद्घाटन गरे । उद्घाटनपछि कार्यक्रममा बोल्दै उनले खेलकुदले समाजमा शिक्षा प्रदानसँगै स्थानीय ठाउँको विकास हुने बताए ।
कार्यक्रममा इटहरी २० का वडाध्यक्ष मणिराम श्रेष्ठले खेल क्षेत्रले शारीरिक तथा मानसिक रूपमा स्वस्थ भइने भएकाले पनि युवाहरूले सञ्चालन गरेको उक्त प्रतियोगिता सकारात्मक रहेको बताए ।
प्रतियोगिताको उद्घाटन खेलमा तालतलैया फुटबल क्लब विजयी भएको छ ।
आयोजक खार्साला युवा क्लवलाई शून्यका बिरुद्द २ गोलले पराजित गर्दै तालतलैया फुटबल क्लब विजयी भएको हो । खेलमा तालतलैयाका किरण राईले पहिलो हाफकोे २३ मिनेटमा पहिलो गोल गरे ।
यस्तै, खेलको दोस्रो हाफको ४३ औं मिनेटमा रोयल राईले अर्को गोल थपेर आफ्नो टिमलाई विजयी बनाए ।
खेलको म्यान अफ दि म्याच तालतलैया फुटबल क्लबकै किरण भए । उनले एक हजार नगदसहित ट्रफी र प्रमाणपत्र प्राप्त गरे ।
खेलमा १६ वटा टीमको सहभागिता रहेको आयोजकका अध्यक्ष राजा विष्टले बताए ।
उनका अुनसार खेलको समापन भदौ ३० गते गरिनेछ । विजेता टिमले नगद पचास हजारसहित ट्रफी हात पार्नेछ भने उपविजेता टिमले पच्चीस हजारमा चित्त बुझाउनेछ ।
उद्घाटन खेलमा रुद्रबहादुर राईले स्वागत मंतब्य राखेका थिए भने धीरज पुरीले कार्यक्रम सञ्चालन गरेका थिए ।
Discussion about this post