तरहरा : इटहरी २० तरहरामा रहेको राष्ट्रिय जनसहयोग कलेजले कलेज सभा सम्पन्न गरेको छ ।
मंगलबार एक कार्यक्रमको आयोजना गर्दै कलेज सभा आयोजना गरिएको हो ।
प्रदेश १ का सांसद सर्वध्वज साँवाको प्रमुख आतिथ्यतामा आयोजना गरिएको कार्यक्रममा उत्कृष्ट विद्यार्थीहरूलाई पुरस्कृत समेत गरिएको थियो ।
बिबिएसमा उत्कृष्ट अंक प्राप्त गर्ने छात्रा दीक्षा खड्कालाई सम्मानपत्रसहित नगद प्रदान गरिएको थियो ।
यस्तै, उत्कृष्ट अंक प्राप्त गर्ने बिबिएसकै विद्यार्थी खेमकुमारी भुजेल, उत्तम गिरी, अर्चना अधिकारी, सुदीप थापा, मनकुमार बानियाँ र सिजन प्रधानलाई पनि पुरस्कार प्रदान गरिएको छ ।
यस्तै, अतिरिक्त क्रियाकलापमा सहभागी विद्यार्थीहरूसहित गरिब तथा जेहेनदार विद्यार्थीलाई पनि पुरस्कृत गरिएको क्याम्पस प्रमुख द्रोर्णबहादुर न्यौपानेले बताए । ०६६ सालमा ५७ जना विद्यार्थी र पाँचजना शिक्षकबाट सुरु भएको कलेजमा हाल दुई सय बढी विद्यार्थी रहेको न्यौपानेले बताए ।
क्याम्पसमा बिबिएस, बिएड विषय अध्यापन हुँदै आएको छ । साथै कार्यक्रममा प्रगति प्रतिवेदन प्रस्तुत गरियो ।
यस्तै, कार्यक्रममा सञ्चालक समितिकी कोषाध्यक्ष दमन्ता कार्कीले आर्थिक प्रतिवेदन प्रस्तुत गरेकी थिइन् ।
इटहरी २० का वडाध्यक्ष मणिराम श्रेष्ठ, माओबादी केन्द्र इटहरी २० का अध्यक्ष नवराज मैनाली लगायतले बोल्दै वार्षिक रूपमा उत्कृष्ट अंक प्राप्त गर्ने कलेजको प्रशंसा गरेका थिए ।
कलेजकी उपाध्यक्ष लीलादेवी राईले स्वागत मंतव्य राख्दै दुई वर्ष कोरोनाका कारण कलेज सभा गर्न नसकिएको बताइन् ।
Discussion about this post