इटहरी : नवौँ राष्ट्रिय खेलकुद प्रतियोगिताको लागि प्रदेश १ को खेलाडी छनौट अन्तर्गत कुस्तीको प्रतियोगिता मंगलबार इनरुवा रंगशालामा सुरु भएको छ ।
प्रदेश खेलकुद विकास बोर्डको आयोजनामा भएको उक्त प्रतियोगितामा प्रदेशका विभिन्न जिल्लाका कुस्ती खेलाडीहरूको सहभागिता रहेको थियो ।
छनौट प्रतियोगिताको उद्घाटन मंगलबार इनरुवा नगरपालिकाका मेयर केदार भण्डारीले गरेका थिए ।
जिल्ला खेलकुद विकास समिति सुनसरीकी उपाध्यक्ष सरस्वती लुइटेल, नेकपा माओवादी केन्द्र इनरुवा नगर कमिटीका तोया गिरी पोद्धार लगायतको उपस्थितिमा भएको उद्घाटन कार्यक्रमको सभापतित्व कुस्ती प्रतियोगिता आयोजक समितिका संयोजक शभ्मु आचार्यको सभापतित्वमा भएको थियो ।
कुस्ती प्रतियोगिताको उद्घाटन सत्रको पहिलो राउण्डको खेलमा ६५ केजी तौल समूहतर्फ झापाका सुनील श्रेष्ठले जीत हासिल गरेका थिए भने दोस्रो प्रतियोगितामा पनि सुनीलले नै जित हासिल गरे ।
यसैगरी ५७ केजी तौल समूहमा भएको दुवै प्रतियोगितामा सुनसरीका कपलदेव यादवले जीत हासिल गरेका थिए ।
यस्तै, ७० केजी तौल समूहको खेलमा सुनसरीका दीपेन्द्र यादव विजयी बनेका थिए भने ७० केजी तौल समूहको अर्को खेलमा झापाका पुनित मेचेले जीत हासिल गरे ।
यस्तै, ६१ केजी तौल समूहमा भएको खेलमा सुनसरीका शिवनारायण यादवले जीत हासिल गरेका थिए ।
प्रदेश १ स्तरीय कुस्ती प्रतियोगिताको फाइनल खेल बुधबार बिहान ८ बजेबाट सुनसरीको सदरमुकाम इनरुवामा हुने जिल्ला खेलकुद विकास समिति सुनसरीकी उपाध्यक्ष सरस्वती लुइटेलले जानकारी दिइन् ।
Discussion about this post