इटहरी (डेस्क) : ताप्लेजुङ र झापाका दुई छुट्टाछुट्टै स्थानमा करेन्ट लगाएर माछा मार्ने क्रममा करेन्ट लागेर दुई युवकको मृत्यु भएको छ ।
ताप्लेजुङको सिदिङ्वा गाउँपालिका ३ का २५ वर्षीय विक्रम ताम्लिङको करेन्ट लगाएर माछा मार्ने क्रममा आफैँलाई करेन्ट लागेर मृत्यु भएको हो ।
माछा मार्न भनेर साम्सिङ खोलामा गएका ताम्लिङको करेन्ट लागेर मृत्यु भएको भन्ने खबर प्राप्त भएसँगै इलाका प्रहरी कार्यालय तेल्लोकबाट प्रहरी टोली खटिइ घटना सम्बन्धमा अनुसन्धान भइरहेको जिल्ला प्रहरी कार्यालय ताप्लेजुङले जनाएको छ ।
यसैगरी झापाको अर्जुनधारा नगरपालिका १० का २७ वर्षीय ईन्द्र चेम्जोङको स्थानीय सेती खोलामा करेन्ट लगाएर माछा मार्ने क्रममा मृत्यु भएको छ ।
करेन्ट लगाई माछा मार्ने क्रममा अचानक आफैँलाई करेन्ट लागेर गम्भीर घाइते भएका चेम्जोङलाई उपचारको लागि झापाको बी एण्ड सी अस्पताल लगिएकोमा उपचारको क्रममा मृत्यु भएको इलाका प्रहरी कार्यालय अनारमनीले जनाएको छ ।
घटना सम्बन्धमा प्रहरीले थप अनुसन्धान गरिरहेको जनाएको छ ।
Discussion about this post