इटहरी : चाइनिज पेस्तोल, गोली, लागूऔषध र चोरिएको मोटरसाइकलसहित इलाका प्रहरी कार्यालय इटहरीले तीनजनालाई पक्राउ गरेको छ ।
इटहरी १५ का ३० वर्षीय सुजित मग्राति माझी र इटहरी १० का १९ वर्षीय मुकेश कोइरालाले चोरीको मोटरसाइकल कुदाइरहेको र पेस्तोल समेत रहेको भन्ने सूचनाका आधारमा प्रहरीले पक्राउ गरेको हो ।
दुवैजनालाई इटहरी १२ बाट पक्राउ गरेको इटहरी प्रहरीले जनाएको छ ।
पक्राउ परेका उनीहरूको साथबाट प्रहरीले १ थान चाइनिज पेस्तोल, सोही पेस्तोलमा लाग्ने ६ राउण्ड गोली, १५० मिलिग्राम ब्राउनसुगर, र नाईट्रोसन ट्याब्लेट तथा प्रदेश नं. १–०२–०४३ प ६८९७ नम्बरको मोटरसाइकल समेत बरामद गरेको हो ।
यस्तै, इटहरी ११ का ३३ वर्षीय मणिकुमार राईलाई मोटरसाइकल चोरी गरेको आरोपमा चोरी भएको मोटरसाइकलसहित प्रहरीले पक्राउ गरेको छ ।
माघ १७ गते इटहरी १ बाट मोटरसाइकल चोरी भएको भन्ने सूचना पाएसँगै खोजतलासमा खटिएको प्रहरी टोलीले चोरी भएको प्रदेश १–०२–०४६ प ३१२९ नम्बरको बुलेट मोटरसाइकलसहित राईलाई पक्राउ गरेको प्रहरीले जनाएको छ ।
हतियार र मोटरसाइकलसहित पक्राउ परेका उनीहरूको सम्बन्धमा इलाका प्रहरी कार्यालय इटहरीबाट थप अनुसन्धान भइरहेको प्रहरीले जनाएको छ।
Discussion about this post