इटहरी : इटहरीका शिक्षासेवी लेखनाथ घिमिरेलाई अभिनन्दित गरिएको छ ।
शुक्रबार उनको ७७ औँ जन्मोत्सवको अवसर पारेर आयोजित कार्यक्रममा अभिनन्दित गरिएको हो । उनकै कद बराबरको अभिनन्दन पत्रले घिमिरेलाई अभिनन्दित गरिएको हो ।
निर्वाचन आयोगका प्रमुख निर्वाचन आयुक्त दिनेशकुमार थपलियाले घिमिरेलाई अभिनन्दन गरेका थिए ।
अभिनन्दन कार्यक्रमपछि बोल्दै प्रमुख अतिथि थपलियाले भने, ‘भाषा, साहित्यको उन्नयन, सामाजिक चेतनाका व्यक्तित्व, शैक्षिक क्षेत्रका संवाहक र शिक्षाको विकासमा लगानी गर्ने अभियन्तालाई अभिनन्दन गर्नु मेरो पनि सौभाग्य हो ।’
घिमिरे सामाजिक व्यक्तित्व मात्रै नभइ प्रेरणाका कुञ्ज रहेको उनको भनाइ छ । ‘उहाँ जहिल्यै पनि अरुको हितमा तल्लीन रहने व्यक्ति हो,’ थपलियाले भने, ‘उहाँको व्यक्तित्व र सादगीपन प्रशंसायोग्य रहेको छ ।’
कार्यक्रममा अभिनन्दित भइसकेपछि घिमिरेले आँफूलाई अभिनन्दन गरेकाले अनुगृहीत भएको बताए ।
‘म अझ जिम्मेवारी र होसियार हुनुपर्छ भन्ने ठानेको छु,’ उनले भने, ‘जीवनका यात्राका क्रममा सकारात्मक सोचले इमान्दारपूर्वक समपर्णले गरिएका काम परिणामुखी र आनन्दायक हुन्छन् ।’
उनले आँफूले ठूला काम नगरेपनि स–साना कामको कदर गरिएकाले कृतज्ञ भएको बताए । भने, ‘यो अनपेक्षित अभिनन्दनले म आँफू कृतज्ञ भएको छु, जीवनमा सधैँ जिम्ेमवारी साथ काम गर्नेछु ।’
घिमिरेलाई रथारोहणसहित इटहरी नगर परिक्रमा गराएर अभिनन्दन कार्यक्रममा सहभागी गराइएको थियो ।
कार्यक्रममा प्रदेश १ का १४ वटै जिल्लाबाट, अन्य प्रदेशका २५ जिल्लाबाट र भारतको विभिन्न प्रदेशबाट उल्लेख्य संख्यामा मानिसहरूको सहभागिता रहेको थियो ।
कवि अनिल पौडेलको संयोजकत्वमा गत चैतमा नागरिक अभिनन्दन मूल समारोह समिति गठन गरी कार्यक्रमको तयारी सुरु गरिएको हो ।
पौडेलले आँफूले अभिनन्दनको प्रस्ताव गर्दा सामाजिक अगुवाहरूले साथ दिएकाले यो कार्यक्रम सम्पन्न भएको बताए ।
यसअघि नागरिक स्तरबाट भाषाविद् प्राध्यापक डाक्टर टंक न्यौपाने र मजदुर नेता ओम कोइरालाई अभिनन्दन गरिएको थियो ।
साथै उक्त कार्यक्रमको अवसर पारेर लेखनाथ घिमिरे अभिनन्दन ग्रन्थ ‘सार्थक जिन्दगी’ पनि सार्वजनिक गरिएको छ । उक्त ग्रन्थमा १ सय ३० भन्दा बढी लेखकहरूले घिमिरेबारे लेख लेखेका छन् । पुस्तक ५४२ पृष्ठको छ ।
Discussion about this post