रामधुनी : रामधुनी नगरपालिका ६ मा रहेको श्री तेह्र बालबालिका स्मृति आधारभूत विद्यालयले आफ्नो स्थापनाको १५ वार्षिकोत्सव तथा अभिभावक दिवस मनाएको छ ।
सोमबार एक कार्यक्रमबीच विद्यालयले अभिभावक दिवससँगै पुरस्कार वितरण पनि गरेको छ । कार्यक्रममा आमन्त्रितहरूले दिवंगत तेह्र बालबालिकाको स्मरण गरेका छन् ।
विद्यालयका प्रधानाध्यापक सुनील तिम्सिनाका अनुसार कक्षा ८ सम्म निःशुल्क रूपमा नेपाली र अंग्रेजी माध्यमबाट अध्यापन हुँदै आएको छ ।
उनका अनुसार २०६३ बैशाख २६ गते विद्यार्थी लिएर झुम्कातर्फ जाँदै गरेको टेम्पो दुर्घटना हुँदा १३ बालबालिकाको निधन भएको थियो ।
उनै बालबालिकाको स्मरणमा स्थापना भएको विद्यालयले हाल विभिन्न क्षेत्रबाट पढ्न आउने बालबालिकालाई निःशुल्क रूपमा पढाउँदै आएको छ ।
‘हामी शिक्षक र कर्मचारी गरेर १९ जना छौँ,’ तिम्सिनाले भने, ‘जसमध्ये सातजनालाई सरकारी स्तरबाट तलव प्रदान गरिदैँ आएको छ भने बाँकी १२ जनालाई निजी स्तरबाट तलव दिदैँ आएका छौँ ।’ उनका अनुसार हरेक महिना तलवका लागि दुई लाख १९ हजार रुपैयाँ स्रोत जुटाउनुपर्ने बाध्यता रहेको छ ।
रामधुनी नगरपालिकाका नगर प्रमुख शंकरलाल चौधरीको प्रमुख आतिथ्यतामा भएको कार्यक्रममा विद्यार्थीहरूले आँफूभित्र भएको क्षमता प्रस्तुत गरेका थिए ।
नृत्य, फेसन शो, गायन तथा विभिन्न सृजनशील कार्यक्रममा विद्यार्थीहरूको उल्लेख्य सहभागिता थियो ।
कार्यक्रममा भादगाउँ विद्यालयका प्रधानाध्यापक दशरथ दास, आदर्श माविका प्रधानाध्यापक रवीन्द्र पौडेल लगायतले बोलेका थिए । तेह्र बालबालिका भन्ने बित्तिकै विगतको झझल्को आउने उनीहरूको भनाइ थियो ।
नगरले सुविधा उपलब्ध गराए सरकारी विद्यालयमै निजीको भन्दा गुणस्तरीय शिक्षा पाइने उनीहरूको भनाइ छ ।
‘कुनै पनि निजी विद्यालय हाम्रो हुँदैन, तर सबै सामुदायिक विद्यालय हाम्रा हुन्,’ आदर्श माविका प्रधानाध्यापक पौडेलले भने, ‘राज्यको लगानी खेर जान नदिनका लागि हामी सधैँ विद्यार्थीको शिक्षामा कमी हुन नदिन खटिरहेका छौँ ।’
विद्यालय व्यवस्थापन समितिका अध्यक्ष श्री बहादुर रायको अध्यक्षतामा कार्यक्रम सम्पन्न भएको थियो ।
Discussion about this post