धरान : धरान उपमहानगरपालिकाका मेयर हर्क साम्पाङलाई सात राजनीतिक दलले सचेतना गराएका छन् ।
गत चैत ८ गते सात राजनीतिक दलले मेयर साम्पाङलाई ज्ञापन पत्र बुझाएपनि मेयरको प्रतिक्रिया नआएपछि दलहरूले एक कार्यक्रमको आयोजना गर्दै सचेतना गराएका हुन् ।
संघीय लोकतान्त्रिक राष्ट्रिय मञ्च धरानका कार्यबाहक अध्यक्ष मोहन तिगेलाको संयोजकत्वमा भएको सचेतना कार्यक्रममा उपमहागनरभित्रका गतिविधिको सम्बन्धमा सचेतना कार्यक्रम गरिएको हो ।
उपमहानगरपालिका जनप्रतिनिधिहरूबीचको अन्तरद्वन्द्व त्यसले निम्त्याएका समस्याहरूको बारेमा धरानका जनताहरू सचेत हुनुपर्ने उपस्थितहरूले बताएका थिए ।
महेन्द्र बहुमुखी क्याम्पसका पूर्व क्याम्पस प्रमुख तथा नागरिक समाजका अगुवा समेत रहेका कुमार बहादुर कार्कीले नगरप्रमुख एकातिर र वडाध्यक्ष अर्कातिर हुँदा नगरको सर्वाङ्गीण विकास र नगरबासीको अपेक्षित समृद्वि हुन नसक्ने बताए ।
उनले नगर प्रमुखको स्वकीय सचिवको सहायकले वडाध्यक्षलाई पत्र काट्नु मर्यादित नहुने भन्दै धरानका वडाध्यक्ष, नगरप्रमुख र स्वकीय सचिवको विवादमा अलमलिएकाले विकास निर्माणका मुद्दाहरू ओझेलमा परेको बताए ।
नेकपा एमालेबाट वडा नम्बर १५ को वडाध्यक्षमा निर्वाचित नरेश इवारमले आँफू जनप्रतिनिधि भएको २ कार्यकालमा यो पहिलो ऐतिहासिक सचेतना कार्यक्रम रहेको बताउँदै धरानको पछिल्लो वास्तविक अवस्था थाहा पाउन सामाजिक सञ्जालभन्दा बाहिर निस्किएर हेर्नुपर्ने बताए ।
नगर प्रमुखबाट वडाध्यक्षहरू अन्यायमा रहेका भन्दै स्थानीय सरकार सञ्चालन ऐन २०७४ अध्ययन गर्न नगरप्रमुखलाई राईलाई सुझाव दिए ।
उनले भने, ‘शक्ति पृथकीकरणको सिद्धान्त अनुसार, राज्यको पुनर्संरचनाको मर्म अनुसार हामी नगरको विकास गर्न गएका हौँ । तर, सुकुम्बासी समस्या, पानीको समस्या, बिजुली सुविधाको सिफारिस गर्ने अधिकार मेयरको टेबुलमा अड्किएका छन् ।’
नेकपा माओवादी धरान नगर कमिटीका अध्यक्ष तथा धरान १७ का वडाध्यक्ष सूर्यबहादुर भट्टराई (मनोज) ले धरान नगर सरकारको कुकृत्यका विरुद्धमा सङ्घर्षमा रहेको बताएका छन् ।
उनले नगरको हितमा कार्यपालिकामा बोल्दा जबरजस्ती खोला बेचुवा दलालका रूपमा चित्रण गरिएकाले आँफूहरूको आपत्ति रहेको बताए ।
उनले भने, ‘वडाध्यक्षहरूले विधि, विधानको पक्षमा बैठकमा कुरा उठाउँदा बैठक स्थगित गर्ने, अस्वाभाविक रूपमा कर्मचारीलाई कारबाही गर्ने, कार्यपालिकामा फरक मत राख्दा वडाध्यक्षलाई स्पष्टीकरण सोध्ने, सङ्घ र प्रदेशको योजना ल्याउन नदिने, सेवाग्राहीलाई धरपकड गर्ने जस्ता गतिविधि गरिरहेपछि हामीले यो किसिमको कार्यक्रम आयोजना गरेर सचेतना गराएका हौँ ।’
कार्यक्रममा नेकपा एमाले धरान नगर अध्यक्ष हर्कजङ्ग एभेङले जनप्रतिनिधि सहकार्य गरेर काम गर्नुपर्ने बताए ।
नगर प्रमुख साम्पाङकाविरुद्व यति धेरै दल एकैठाउँ सङ्गठित हुनुपर्ने आवश्यकता नरहेको तर निरङ्कुश हुने, शक्ति आफैँमा केन्द्रित गर्ने प्रवृत्ति र विसङ्गतिविरुद्ध सङ्गठित हुनुपर्ने बाध्यात्माक स्थिति बनेको उनको भनाइ छ ।
नेपाली कांग्रेसका धरान नगर सभापति श्याम पोख्रेलले अभियानताका नाममा सिधासाधा जनतालाई भ्रममा पारेर जनतामाथि चन्दा आतङ्क मच्चाउने कार्य भएको बताए ।
उनले अभियानका नाममा लिएको रकम बापत दिइने रसिदको आधिकारिकता माथि समेत प्रश्न उठाउदै विगतको मेयरको गतिविधिबारे उजागर गरिने बताए ।
‘हामी खानेपानीको समाधानको पक्षमा छौँ तर अभियानको नाममा देश विदेशका नेपाली दाजुभाइहरूले पठाएको आर्थिक हिसाबको लेखाजोखा सार्वजनिक हुन जरुरी छ’ उनले भने, ‘एकल निर्णय गर्ने ? अहिलेसम्म खानेपानी व्यवस्थापन बोर्डको एउटा बैठक नबसेको र बोर्डका अरू सदस्यलाई के भइरहेको छ थाहा छैन ।’
पोख्रेलले बोर्ड र धरानको भानुचोकस्थित घण्टाघरमा लामो समयदेखि कार्यरत कर्मचारीलाई बिनाकारण अवकाश गराएर आफ्नो मान्छे नियुक्त गरेको समेत आरोप लगाए ।
Discussion about this post