इटहरी : इटहरीमा सोल्टी ब्राण्डले पाँचतारे स्तरको ‘सोल्टी वेस्टेन्ड इटहरी’ सञ्चालनमा ल्याएको छ ।
बुधबार (जेठ ३, २०८०) मा पाँचतारे होटलको उद्घाटन गरिने मंगलबार आयोजित पत्रकार सम्मेलनमा जानकारी दिइयो ।
गरिमा प्राइभेट लिमिटेडको स्वामित्व तथा अन्तराष्ट्रिय स्तरमा प्रसिद्व रहेको सोल्टी होटलको सम्बद्व होटल व्यवस्थापक सहयोगी कम्पनीबाट व्यवस्थापन गरिने बताइएको छ ।
इटहरीको धरान लाइनमा रहेको होटलमा सुविधा सम्पन्न ८० वटा अतिथि कोठा रहेका छन् । यस्त्ै, होटलमा २४ घण्टा नै सेवा दिने र जीवन्त सेवाप्रवाह दिने बताइएको छ ।
गरिमा होटल प्रालिका अध्यक्ष भीमबहादुर पौडेलले इटहरीको व्यावसायिक र आर्थिक गतिविधि विकासमा उक्त होटलले अहम् भूमिका निर्वाह गर्ने बताए ।
उनका अनुसार दुई अर्ब लागतमा उक्त होटल स्थापना भएको हो । होटलमा दुई सय जनाले रोजगारी पाउने उनले बताए ।
सोल्टी होटेलका उपाध्यक्ष सुदर्शन चापागाईँले इटहरीले अब अन्तर्राष्ट्रिय स्तरको ‘एक्स्पोजर’ पाएकोमा खुशी व्यक्त गरे ।
स्वीमिङपुल, स्पा, कार्यक्रम तथा सेमिनार हल, फिटनेस सेन्टर लगायतका सुविधा उपलब्ध रहेको उनले जानकारी दिए । एक बिघा क्षेत्रफलमा रहेको होटलको डिजाइन भारतीय इन्जिनियरिङ कन्सल्टेन्सीले गरेको हो ।
होटलमा एउटा प्रेसिडेन्सियल स्वीट, आठवटा स्वीट रुम, १२ वटा एक्जुक्युटिभ रुम, २२ वटा डिलक्स रुम र ४७ वटा स्ट्यान्डर्ड रुम समावेश गरिएको छ ।
सोल्टी वेस्टेन्ड इटहरीमा पूर्वकै व्यापारिक केन्द्र र प्रोजेक्टसँग सम्बन्धित कार्यक्रम, विवाह, मनोरञ्जन, जन्मोत्सव, वैवाहिक वर्षगाँठ, नयाँ वर्ष लगायतका समारोह मनाउन आउनेको जमघट हुने बताइन्छ ।
गरिमा होटलको नाममा निर्माण सुरु भएको होटलले ५६ वर्ष पुरानो नेपालमा अन्तर्राष्ट्रिय मापदण्डको पाँचतारे होटल सोल्टीसँग सम्झौता गरी सञ्चालनमा ल्याइन लागेको हो ।
Discussion about this post