मोरङ : जिल्ला प्रहरी कार्यालय मोरङले सुन र चाँदी चोरीमा संग्लग्न रहेको आरोपमा पक्राउ परेका तीनजनालाई सार्वजनिक गरेको छ ।
जेठ ३ गते विराटनगर महानगरपालिका ३ का जयकिशोर चौधरीको घरमा चोरी भएको सूचना पाएसँगै तत्काल घटनास्थलमा खटिएको प्रहरी टोलीले अनुसन्धान सुरु गरेको थियो ।
चौधरीको घरबाट २० तोला सुन र ३६ केजी चाँदी चोरी भएको जानकारी पाएसँगै जिल्ला प्रहरी कार्यालय मोरङले उक्त घटनाको अनुसन्धानको लागि ८ जनाको अनुसन्धान टोली परिचालन गरेको र सुक्ष्म अनुसन्धानको क्रममा घटनामा संग्लग्न तीनजनालाई जेठ १० गते राति पक्राउ गरेको हो ।
पक्राउ पर्नेहरूमा विराटनगर १२ का २१ वर्षीय राजकुमार कामत, १९ वर्षीय विवेक कामत र २२ वर्षीय श्रीकान्त दास रहेका छन् ।
जयकिशोर चौधरी र ज्योतीप्रसाद खाँ ले साझेदारीमा ज्वलर्स सञ्चालन गर्ने गरेको र ज्वलर्सका समानहरू चौधरीको घरमा राख्ने गरेकोमा घरैबाट चोरी भएको थियो ।
चोरीमा संग्लग्न व्यक्तिहरू पीडितका छिमेकी वा चिनेजानेकै व्यक्तिहरू भएको आशंकामा अनुसन्धान सुरु गरेको प्रहरी टोलीले घटनास्थल आसपासका केही व्यक्तिहरूको निरन्तर निगरानी गर्ने क्रममा उनीहरूलाई पक्राउ गर्न सफल भएको प्रहरीले जनाएको छ ।
पक्राउ परेका व्यक्तिहरूमध्ये विवेक कामत चोरी मुद्धामा ९ महिनाको सजाय भुक्तान गरेर यही वैशाख २८ गते छुटेको प्रहरीको अनुसन्धानबाट खुलेको छ ।
यस्तै, श्रीकान्त दास डाका मुद्धामा २० महिनाको सजाय भुक्तान गरी गत असोज ३ गते छुटेका हुन् । उनीहरूले चोरी गरेकोमध्ये सुन भारतीय बजार बेचेको र ३५ केजी चाँदी प्रहरीले बरामद गरेको जिल्ला प्रहरी कार्यालय मोरङले जनाएको छ ।
पक्राउ परेका उनीहरूको साथबाट प्रहरीले ३५ केजी चाँदीसहित भारतिय रुपैयाँ २ हजार ५ सय, नेपाली रुपैयाँ १ हजार ७ सय ३० र २ थान मोबाइल समेत बरामद गरेको र घटना सम्बन्धमा थप अनुसन्धान भइरहेको मोरङ प्रहरीले जनाएको छ ।
Discussion about this post