धरान : धरानमा नेपाली कांग्रेसले १० जनालाई सम्मान गरेको छ । दुई चिकित्सक, समाजसेवी, जनप्रतिनिधि, सुरक्षाकर्मी लगायतलाई कांग्रेसले सम्मान गरेको हो ।
पार्टीको १४ औँ महाधिवेशनपश्चात धरान नगर समितिको सम्मेलन गर्दै सुनसरी उद्योग वाणिज्य संघको सभाहलमा उक्त कार्यक्रमको आयोजना गरिएको हो ।
कांग्रेस धरान नगर समितिका सभापति श्याम पोख्रेलको सभाध्यक्षमा सम्पन्न कार्यक्रममा कांग्रेसका पूर्व केन्द्रीय सदस्य गुरुराज घिमिरे प्रमुख अतिथि थिए ।
कार्यक्रममा स्त्री रोग विशेषज्ञ ध्रुवकुमार उप्रेती, चिकित्सक एलिन सुन्दास, प्राध्यापक राजविमल श्रेष्ठ, सामाजिक अभियन्ता मीना पुलामी, प्रजातन्त्र सेनानी कृष्ण प्रसाद सुवेदी (बहुदल कान्छा), जनप्रतिनिधि शान्तिदेवी राई, हेम कुमारी विश्वकर्मा, सीता दाहाल, क्षेत्रीय प्रतिनिधि प्रेमकुमार राई र जिल्ला ट्राफिक प्रहरी कार्यालय धरानका प्रहरी निरीक्षक श्यामबहादुर बस्न्यातलाई सम्मान गरियो ।
कार्यक्रममा प्रमुख अतिथि घिमिरेले कांग्रेसको आगामी रणनीति, पार्टी सुदृढीकरणका लागि आवश्यक नेतृत्व परिवर्तन, पार्टीमा युवाको आकर्षण र भ्रष्टाचार निर्मूल अभियान र समृद्धिका लागि आर्थिक नीति अवलम्बन गर्नुपर्ने बताए ।
कांग्रेस सुनसरी सभापति केदार भण्डारीले महाधिवेशनपछि पार्टीमा वैमानस्यता सृजना भएको बताए । धरान उपमहानगरपालिकाका पूर्व मेयर तिलक राईले प्रतिकूल समयलाई अनुकूल बनाउनुपर्ने बताए ।
उक्त सम्मेलनमा नगर समितिको सांगठानिक प्रतिवेदन नगर सचिव जीतेन्द्र रुमदालि राईले प्रस्तुत गरे भने नगर सचिव हिमाल श्रेष्ठले कार्यक्रम सञ्चालन गरेका थिए ।
Discussion about this post