इटहरी : अपहरण गरी भारतमा बन्धक बनाएर पचास लाख फिरौती माग गरेको आरोपमा सुनसरी प्रहरीले एक युवकलाई पक्राउ गरेको छ ।
जिल्ला प्रहरी कार्यालय सुनसरीका प्रहरी नायब उपरीक्षक राजकुमार राईका अनुसार पक्राउ पर्नेमा सुनसरीको बराहक्षेत्र नगरपालिका ५ बस्ने २९ वर्षीय सन्तोष बस्नेत रहेका छन् ।
गत वैशाख २५ गते सामान खरिदका लागि भारतको बेला बजारमा गएको समयमा दुईजनालाई अपहरण गरी रकम फिरौतीको माग गरिएको थियो ।
बराहक्षेत्र ५ बस्ने १९ वर्षीय सौगात भण्डारी, सोही ठाउँका २२ वर्षीय छविलाल आचार्य, हरी आचार्य र सुनील गिरीसहित चारजना भारत गएका थिए ।
जसमध्ये भण्डारी र आचार्यलाई साँझ ५ बजेको समयमा इम्तियाज भन्ने व्यक्तिसहित सातजनाको समूहले पेस्तोल देखाएर बलपूर्वक मोटरसाइकल नियन्त्रणमा लिएका थिए ।
बन्धक बनाइसकेपछि अपहरणकारीहरूले पीडित भण्डारीका बाबुको मोबाइलमा वैशाख २६ गते भारतीय मोबाइल नम्बरबाट फोन गरी पचास लाख फिरौती रकम माग गरिएको प्रहरी नायब उपरीक्षक राईले जानकारी दिए ।
फिरौती रकम नदिए ज्यान मार्ने धम्की समेत दिइएको प्रहरीको प्रारम्भिक अनुसन्धानबाट खुलेको छ । प्रहरीकाअनुसार रकम माग गरेपछि अपहरणकारीहरूलाई पीडितका बाबुले सोही दिन एक लाख पचास हजार रकम समेत बुझाएका थिए ।
बन्दी रहेका पीडितहरूले वैशाख २७ गते भागेर नेपाल आएको र प्रहरीमा खबर गरेका थिए ।
प्रहरीले उक्त फिरौती रकम माग्ने, लिने र मुख्य योजना बनाउने बराहक्षेत्रका सन्तोष बस्नेतलाई अनुसन्धानको क्रममा सोमबार (असार २५) गते पक्राउ गरेको सुनसरी प्रहरीले जनाएको छ ।
बस्नेतले नै भारतीय नागरिक इम्तियाजसँग मिलेर अपहरण गरेकको पुष्टि भएसँगै उनलाई खोजतलास गर्ने क्रममा पक्राउ गरिएको हो ।
घटनापछि बस्नेत फरार रहेका थिए । इलाका प्रहरी कार्यालय महेन्द्रनगरको टोलीले धरानबाट उदयपुरतर्फ भाग्दै गर्दा बराहक्षेत्र १ स्थित झण्डाचोकबाट पक्राउ गरेको हो ।
पक्राउ परेका बस्नेतमाथि जिल्ला अदालत सुनसरीबाट सात दिनको म्याद थप गरी आवश्यक अनुसन्धान तथा कारबाहीको प्रक्रिया अगाडि बढाइएको सुनसरी प्रहरीले जनाएको छ ।
Discussion about this post