इटहरी : सुनसरीको बराहक्षेत्र नगरपालिका ९ राजाबासस्थित युवतीहरूमाथि कुटपिट गर्ने पाँचैजनालाई प्रहरीले पक्राउ गरेको छ ।
असार २९ गते साँझ ५ बजेतिर भएको घटनामा संलग्न पाँचैजनालाई विभिन्न मितिमा पक्राउ गरी सार्वजनिक गरिएको हो ।
जिल्ला प्रहरी कार्यालय सुनसरीका प्रवक्ता, डीएसपी राजकुमार राईका अनुसार पक्राउ पर्नेहरूमा बराहक्षेत्र १० की १९ वर्षीया प्रीति लिम्बू, बराहक्षेत्र ८ की १९ वर्षीया दुर्गा राई, सोही वडाकी २२ वर्षीया विनिता उराँव, बराहक्षेत्र ९ की १९ वर्षीया सन्जिता राई र सोही ठाउँकी १९ वर्षीया निहाङ राई रहेकी छन् ।
बराहक्षेत्र ९ कै मनीषा राईसहित तीनजनाले उनीहरूको विरुद्धमा प्रहरीमा उजुरी दिएको र कुटपिट गरेको भिडियोसमेत सामाजिक सञ्जालमा भाइरल बनेपछि प्रहरीले तत्काल फरार रहेका उनीहरूको खोजी कार्य अगाडि बढाएको थियो ।
जाहेरीका आधारमा प्रहरीले सोही दिन प्रीतिलाई पक्राउ गरेको थियो । यस्तै, दुर्गा र विनितालाई भने साउन २ गते इटहरीबाट पक्राउ गरिएको सुनसरी प्रहरीले जनाएको छ ।
अन्य फरार रहेका दुईजना सञ्जिता र निहाङलाई बिहीबार पक्राउ गरिएको डीएसपी राईले जानकारी दिए ।
उनीहरूको समूहले आफ्नो ब्वाइफ्रेन्डसँग बोलेको भन्दै बराहक्षेत्र ८ की १७ वर्षीया सन्ध्या परियार, १६ वर्षीया नवीना विश्वकर्मा र १९ वर्षीया मनीषा राईलाई निर्घात कुटपिट गरेको भिडियो सामाजिक सञ्जालमा भाइरल बनेको थियो ।
पक्राउ परेका तीनैजनामाथि अभद्र व्यवहार मुद्वामा जिल्ला अदालत सुनसरीबाट म्याद थप गरी इलाका प्रहरी कार्यालय महेन्द्रनगरमा राखेर आवश्यक अनुसन्धान तथा कारबाही भइरहेको प्रहरीले जनाएको छ ।
यो पनि–सुनसरीमा युवतीमाथि कुटपिट प्रकरण : यी हुन् प्रहरीले पक्राउ गरेका तीनजना, दुई अझै फरार
यो पनि – सप्तकोसी किनारमा युवतीहरूबीच कुटपिट प्रकरण : थप दुईजना इटहरीबाट पक्राउ
Discussion about this post