इटहरी : इटहरीस्थित सुष्मा कोइराला मेमोरियल इञ्जिनियरिङ कलेजले सिटिइभिटीको मान्यताविपरीत विद्यार्थीबाट शुल्क उठाउने गरेको पाइएको छ ।
डिप्लोमा इन सिभिल इञ्जिनियरिङ र डिप्लोमा इन कम्युटर इञ्जिनियरिङको कोर्ष अन्तरगत कलेजले सिटिइभिटीले तोकेको शुल्कभन्दा बढी रकम लिएको पाइएको हो ।
कलेजले गरेको प्रचारमा ‘आफ्नै सहरमा, तीन वर्षको दुई लाख पचास हजारमा इञ्जिनियरिङको अध्ययन’ गर्न पाइने भनेको छ ।
तर, सिटिइभिटीले भने साझेदारी/प्रतिष्ठान नेपाल सरकारबाट अनुदान प्राप्तको हकमा एक लाख ९० हजार रुपैयाँ र साझेदारी/प्रतिष्ठान नेपाल सरकारबाट अनुदान प्राप्त नभएकाको हकमा भने दुई लाख पाँच हजार रुपैयाँ शुल्क तोकिएको छ । तर, सुष्मा कलेजले भने सिटिइभिटीको मान्यताविपरीत दुई लाख ५० हजार रुपैयाँ शुल्क तोक्दै विज्ञापन गरेको छ ।
कलेजले सिट सीमित रहेको जनाउँदै विभिन्न विशेषता देखाएर विद्यार्थीलाई लोभ्याएको जानकारहरू बताउँछन् ।
२०५७ सालदेखि हालसम्म दक्ष प्राविधिक उत्पादन गरी विभिन्न सरकारी निकायमा आफ्ना विद्यार्थीहरूले काम गरेको जनाउँदै कलेजले बढी शुल्क तोक्दै विज्ञापन गर्दै आएको छ ।
सिटिइभिटीको मान्यताविपरीत शुल्क उठाउनु गैरकानुनी भएको बताइन्छ । सिटिइभिटी कोसी प्रदेशकी प्रमुख दीपिका शर्माले तोकेको शुल्कभन्दा बढी लिन नपाइने बताइन् ।
‘सिटिइभिटीले तोकेको शुल्कभन्दा बढी रकम लिन पाइदैँन,’ उनले भनिन्, ‘यदि त्यसो पाइएमा सम्बन्धित विद्यार्थीहरूले लिखित रूपमा प्रमाणसहित निवेदन दिनुभयो भने सम्बन्धित संस्थालाई चेतावनी दिदैँ आवश्यक कारबाहीको प्रक्रिया अगाढि बढाउँछौँ ।’
उनले लिखित निवेदन आएमा कारबाहीको प्रक्रिया अगाडि बढाइने बताइन्। ‘हाम्रो वेबसाईटबाट पनि शुल्क निर्धारण गरेर राखेका छौँ,’ शर्माले टाकुरा न्यूजसँग भनिन्, ‘हामीले तोकेको मूल्यको न्यूनतम जतिमा पनि पढाउन पाइन्छ तर तोकेको शुल्कभन्दा अधिकतम भयो भने कारबाहीको प्रक्रिया अगाडि बढाउनेछौँ ।’
सिटिइभिटीको मान्यता प्राप्त संस्थाबाट मनोमानी भएको पाइएमा नियमन गर्ने जिम्मेवारी आँफूहरूकै रहेको उनले सुनाइन् ।
यता, सुष्मा कलेजका प्रधानाध्यापक बोधराज नेपालले सिटिइभिटीले मूल्य नतोकेको दाबी गरे । ‘सिटिइभिटीले मूल्य त तोकेको छैन, तोक्दा यो भन्दा कम मूल्य तोक्दैन,’ उनले भने, ‘अढाइ लाख त हो नि, सस्तो छ ।’
उनले तीन वर्षे कोर्षको दुई लाख पचास हजार रुपैयाँ सस्तो भएको र सिटिइभिटीले मूल्य नतोकेको प्रतिक्रिया दिए । ‘सिटिइभिटीले मूल्य तोक्दा यो भन्दा कममा तोक्दैन,’ उनले भने ‘भर्ना हुने बेला यतिखेरै हो । ओभरसियर विषय भएका कारण एसइइपछि यो कोर्ष गर्न सकिन्छ ।’
खासगरी सुष्मा कोइराला मेमोरियल इञ्जिनियरिङ ट्रष्टले उक्त विषयको मान्यता प्राप्त गरेको हो । ट्रष्टको नाममा मान्यता प्राप्त भएपछि मुनाफारहित अर्थात् नाफा आर्जन गर्न पाइदैँन । ट्रष्ट नाफारहित संस्था हो ।
तर, सुष्मा कोइराला मेमोरियल इञ्जिनियरिङ कलेजले व्यवस्थापन गरेर डिप्लोमा इन सिभिल इञ्जिनियरिङ र डिप्लोमा इन कम्युटर इञ्जिनियरिङको कोर्ष अध्यापन गर्दै आएको छ । जुन गैरकानुनी रहेको सिटिइभिटीले जनाएको छ ।
सिटिइभिटीले तोकेको शुल्क हेर्नुहोस् :
Discussion about this post