इटहरी : दसैँको समयमा टाढाबाट आएका आफन्तहरूका कारण घरै उज्यालो हुने गर्छ । आफन्त भेटघाट गर्ने, रमाइलो गर्ने, छरछिमेकमा खुशीयाली साटासाट गर्दा मनै फुरुङ्ग हुन्छ ।
तर, विराटनगरका सुवेदी परिवारमा भने दसैँको कुनै उत्साह, उमंग छैन । विराटनगर ४ राजवंशी चोक घर भएकी ब्रजुना सुवेदी अहिले श्रीमान बेपत्ता भएकाले खोजीमा छटपटिरहेकी छन् ।
विवाह गरेको सात महिनामै आफ्ना श्रीमान दिलीप सुवेदी बेपत्ता भएपछि उनको खोजी गरिएपनि नभेटिएपछि थप पीडा भएको ब्रजुना सुनाउँछिन् ।
३७ दिनदेखि श्रीमान बेपत्ता भएपनि खोजी कार्य गरिएपनि पत्ता नलागेको उनी सुनाउँछिन् । ‘सबैतिर दसैँ आयो’ ब्रजुना भन्छिन्, ‘अचानक सम्पर्कबिहीन हुनुभएका श्रीमान अझै घर आउनुभएन, मेरा लागि यो वर्षको दसैँ दसा भएर आयो ।’
झापाको सुरुङ्गास्थित नेपाल टेलिकमको कार्यालयमा निमित्त प्रमुखका रूपमा कार्यरत दिलीप ३७ दिनअघि कार्यालयबाटै सम्पर्कबिहीन बनेका थिए । उनी टेलिकमले उपलब्ध गराएको क्वाटरमा बस्दै आएका थिए । झापाको कनकाई नगरपालिका ३ सुरुङ्गाको नयाँ बस्तीस्थित क्वाटरबाट उनी अचानक बेपत्ता भएका हुन् ।
विवाह गरेको पहिलो वर्ष श्रीमानसँगै माइती जाने योजना बुनेकी उनी अहिले श्रीमान बेपत्ता भएकाले खोजी गर्न भौतारिरहेकी छिन् । प्रहरीकहाँ जाहेरी दिएपनि प्रहरीले खोजी कार्य गरिरहेको जनाएको छ ।
ब्रजुना भन्छिन्, ‘सपनामा नसोचेको भयो, कहाँ हुनुहोला, के अवस्था होला भनेर भोक न निद्रा भएकी छु ।’ सुवेदीले प्रयोग गर्ने मोबाइल फोन बेपत्ता भएकै बेलादेखि ‘स्वीच अफ’ रहेकाले सम्पर्कबाहिर रहेको उनको भनाइ छ ।
‘उहाँ सम्पर्कबिहीन भएको बेलादेखि नै फोन अफ छ’ रोदनमिश्रित भावमा उनले भनिन्, ‘तर मन मान्दैन, अनि कतै लागिहाल्छ कि भनेर मेरा औंला उहाँको नम्बर डायल गर्न छाड्दैनन् ।’
इलाका प्रहरी कार्यालय बिर्तामोडका प्रहरी नायव उपरीक्षक सुरज कार्कीले प्रहरीका सबै युनिटहरूमा सुवेदीको तस्वीर पठाएर खोजतलास गरिरहेको बताए । खोजी कार्यलाई तीव्रता दिइएको उनले बताए ।
Discussion about this post