तरहरा : तरहरा जेसीजको आयोजनामा भएको रक्तदानमा ३० पिन्ट रगत संकलन भएको छ ।
बुधबार तरहरामा भएको रक्तदानमा ३० पिन्ट रगत संकलन भएको हो ।
तरहरा जेसीजका अध्यक्ष बहादुर तामाङको अध्यक्षता तथा उपाध्यक्ष विनिता तामाङको संयोजकत्वमा भएको कार्यक्रममा उक्त संख्यामा रगत संकलन भएको हो ।
वीपी कोइराला स्वास्थ्य विज्ञान प्रतिष्ठान धरानका डिन डा. धनकेशर खड्काको प्रमुख आतिथ्यतामा सम्पन्न कार्यक्रममा नेपाल जेसीजका उपाध्यक्ष गुरुदेव पौडेल, नेपाल रेडक्रस सोसाइटी हाँसपोसा उपशाखाका अध्यक्ष सुमन दाहाल, तरहरा जेसीजका पूर्व अध्यक्ष चन्द्रकुमार गिरीलगायतले बोल्दै रक्तदान गर्नु जीवनदान गर्नुसरह रहेको बताए ।
तरहरा जेसीजको शनिबारबाट सुरु भएको सप्ताह कार्यक्रम अन्तर्गत रक्तदान कार्यक्रमको आयोजना गरिएको हो । मंगलबार तरहरा फुटसलमा क्षेत्र क भरीका ८ वटा शाखाबीच फुटसल प्रतियोगितासमेत आयोजना गरिएको थियो ।
आगामी शुक्रबार लोकनृत्य प्रतियोगिता र शनिबार गजल साँझ कार्यक्रमको आयोजना गरिने मूल संयोजक हिमांशु विश्वकर्माले बताए ।
Discussion about this post