इटहरी : सुनसरीमा सहकारीबाटै रकम चोरी भएको छ । सुनसरीको गढी गाउँपालिका ३ मा रहेको एउटा सहकारीबाट मंगलबार राति रकम चोरी भएको हो ।
सहकारीबाट ५ लाख रुपैयाँ चोरी भएको प्रहरीले जनाएको छ ।
जिल्ला प्रहरी कार्यालय सुनसरीका प्रहरी उपरीक्षक (एसपी) विपिन रेग्मीका अनुसार अज्ञात समूहले राति ११ः३० बजेतिर श्री साना किसान कृषि सहकारी संस्थामा प्रवेश गरेर रकम चोरी गरिएको हो ।
चोरीमा संलग्नले सहकारीको लकर नै फोडेर रकम चोरेको जानकारी उनले बताए । घटनामा संलग्न भएको आशंकामा बुधबार साँझ एक जनालाई पक्राउ गरिएको एसपी रेग्मीले बताए ।
अनुसन्धानकै क्रममा रहेको भन्दै पक्राउ परेकाको पहिचान प्रहरीले खुलाएको छैन ।
सीसी क्यामेरा फुटेज हेरेर शंकास्पद एक जनालाई नियन्त्रणमा लिएर सोधपुछ सुरु गरिएको र थप अनुसन्धानपछि घटनाको वास्तविकता खुल्ने जानकारी उनको भनाइ छ ।
सहकारीका अध्यक्ष देवनारायण मण्डलले रकमबाहेक अरु केही चोरी नभएको जानकारी दिए । सहकारीको कागजात भने यत्रतत्र छरिएको अवस्थामा फेला परेको उनले जानकारी दिए ।
Discussion about this post