इटहरी : इटहरीमा रहेको अम्बेकोसी बचत तथा ॠण सहकारी संस्थाका अध्यक्ष फणीन्द्रबहादुर मगर पुर्पक्षका लागि कारागार चलान भएका छन् ।
जिल्ला अदालत सुनसरीमा थुनछेक बहसपछि न्यायाधीश शम्भु गौतमको एकल इजलासले उनलाई कारागार चलान गर्ने आदेश गरेको हो ।
यस्तै, सहकारीका सञ्चालक समिति सदस्य शीला गजमेर पनि अदालतले तोकेको पाँच लाख रुपैयाँ धरौटी बुझाउन नसकेपछि कारागार चलान भएको जिल्ला अदालत सुनसरीका सूचना अधिकारी नवीन कोइरालाले जानकारी दिए ।
पुर्पक्षका लागि मगरलाई झुम्का कारागार चलान गरिएको छ भने गजमेरलाई जिल्ला कारागार कार्यालय मोरङ लगिएको छ ।
पक्राउ परेका लेखा सुपरीवेक्षण समितिका संयोजक राहुल अग्रवाल १० लाख र लेखा समितिकै सदस्य कुमार आले पाँच लाख धरौटी बुझाएर तारेखमा रिहा भएका छन् ।
प्रदेश सहकारी रजिस्ट्रार कार्यालय इनरुवाले ठगीका बारेमा सहकारीका अध्यक्ष मगरसहित ११ जनालाई जिल्ला प्रहरी कार्यालय सुनसरीमा मुद्दा दर्ता गरेपछि प्रहरीले उनीहरूलाई एक महिनाअघि पक्राउ गरिएको थियो ।
११ जनाविरुद्ध प्रहरीमा ठगी मुद्दा दर्ता गरेपनि प्रहरीले भने चारजनालाई मात्र पक्राउ गरेको थियो ।
सहकारीका उपाध्यक्ष देवेन्द्र बस्नेत, सदस्य मीनकुमार आले मगर, सागर राई, टेक बहादुर चर्मकार, राजकुमार तामाङ, सहकारीका व्यवस्थापक भोजकुमार आले मगर र लेखा समिति सदस्य किरण आले भने अहिलेसम्म फरार रहेका छन् ।
उनीहरूलाई जिल्ला प्रहरी कार्यालय सुनसरी मातहतका सम्पूर्ण युनिटहरू मार्फत खोजी गरिए पनि पक्राउ गर्न नसकेको प्रहरीले जनाएको छ ।
सहकारी ऐन २०७४ अन्तर्गत दफा १२२ अन्तर्गत १० करोडदेखि माथि एक अर्बसम्म माग दाबी सहितको बिगो भएमा ६ वर्ष देखि ८ वर्ष सम्म कैद र बिगो बमोजिम जरिवाना गर्ने उल्लेख छ ।
यता, अध्यक्षलाई मात्र कारागारमा हालेर अन्यलाई धरौटीमा छाडेकोप्रति पीडित सङ्घर्ष समितिले भने विरोध जनाएको छ ।
अम्बेकोसी बचत तथा ऋण सहकारी पीडित सङ्घर्ष समितिका संयोजक दुर्गा कोइरालाले अदालतको आदेशलाई सम्मान गर्ने भए पनि निर्णय चित्तबुझ्दो नभएको भन्दै असन्तुष्टि जनाए ।
Discussion about this post