रामधुनी मन्दिरमा आरोप–प्रत्यारोप, ‘अनर्गल’ प्रचार भएको व्यवस्थापन समितिको भनाइ

रामधुनी : सुनसरीको रामधुनी मन्दिरमा पूजारी र व्यवस्थापन समितिबीच आरोप प्रत्यारोप सुरु भएको छ ।

केही दिनअघि मन्दिरमा नित्य पूजा रोकिएको भन्ने समाचारको खण्डन गर्दै रामधुनी बाबा वनखण्डी मन्दिर गुठी व्यवस्थापन समितिले आफूहरूमाथि लगाइएको आरोप ‘अनर्गल’ भएको बताएका छन् ।

मन्दिरका पुजारी महन्त काशीदास उदासी र उनका अनुयायी बताउने मोहीनारायण चौधरीले लगाएको आरोपको प्रतिवादमा पत्रकार सम्मेलन गर्दै रामधुनी बाबा वनखण्डी मन्दिर गुठी व्यवस्थापन समितिले आफूहरूमाथि लगाइएको आरोपलाई कपोकल्पित र भ्रामक भएको जनाएको हो ।

‘मन्दिरमा ताला लगाएर नित्य पूजा रोक्ने काम भएको छैन । सारा आरोप झुटो र निराधार छ,’ समितिका अध्यक्ष डिल्ली कार्कीले भने, ‘मन्दिरमा विवाहित व्यक्तिले पूजारी बन्न पाईँदैन । पूजाआजा गर्न पाइएपनि पुजारी नै बन्न पाइँदैन । मोहीनारायण भन्ने व्यक्ति नै पुजारी बनेको पाइएपछि यसबारे जिल्ला प्रशासन कार्यालयमासमेत छलफल भएको थियो ।’

कार्कीले गुठी संस्थानबाट प्राप्त जिम्मेवारीअनुरूप आफूहरूको समिति कार्यरत रहेको भन्दै कानूनविपरीतका कुनै पनि कार्य नगरेको बताए । उनले नगरपालिकासँग समन्वय गरेर समितिले मन्दिरको हकहितको सवालमा कार्य गर्दै आएको बताए ।

२०७२ असोज १५ गते जिल्ला प्रशासनमार्फत दर्ता गरी सञ्चालन भइरहेको मन्दिरमा २०७७ सालयता भने मोहीनारयण चौधरीको प्रवेशपछि विवाद उत्पन्न भएको उनको भनाइ छ ।

उनले रामनवमी र बाला चतुदर्शीमा यहाँ हजारौं दर्शनार्थी आउने र पछिल्लो समय धार्मिक पर्यटनका हिसाबमा पनि विकास भइरहेको रामधुनी मन्दिरमा पछिल्लो समय अनाधिकृत व्यक्तिहरूले भाँड्न लागेको आरोप लगाए ।

अहिले उक्त मन्दिरमा नेपाल सरकारको तलव बुझ्दै आएका काशीदास उदासी (महन्त) पूजारी रहेका छन् । यसबीचमा ०७७ सालदेखि मोहीनारायणको प्रवेश भएपछि मन्दिरमा एक अर्काबीच आरोप–प्रत्यारोप लगाउने कार्य भएको पाइएको हो ।

मोहीनारायणले आफू ‘उदासी सम्प्रदायको अध्यक्ष हुँ’ भन्दै केही वर्षदेखि पुजारीको भूमिका निर्वाह गर्दैआएका थिए ।

पत्रकार सम्मेलनमा सहभागी भएका रामधुनी नगरपालिका प्रमुख शंकरलाल चौधरीले मन्दिरमा महन्त काशीदास उदासी र गुठी समिति अध्यक्ष डिल्ली कार्कीबीचको विवादलाई पालिकाले सूक्ष्मरूपमा नियालेको बताए ।

चौधरीले भने, ‘मन्दिरमा जहाँतहीँ दान पेटिका राखिएको रहेछ । जसको ताला चाबी स्वयम् मोहीनारायणले राख्ने र दान रकम आफैंले लग्ने गरेको पाइयो ।’

भेटी धेरै उठ्ने र दानपेटिका चारैतिर छरिएर राखिएको बताउँदै उनले दानपेटिकाको चाबी जोसँग छ, उसैले भेटी लैजाने गरेकोसमेत बताए । उनले अहिले भने जनप्रतिनिधिसहित सबैको रोहबरमा दानपेटिकामा जम्मा भएको रकम गणनासमेत गरिदैँ आएको जानकारी दिए ।

रामधुनी वडा नम्बर ४ का अध्यक्ष कमल कार्कीले पछिल्लो समय व्यवस्थापन समितिले हरेक वर्ष वडा कार्यालयमा लेखापरीक्षणको प्रतिलिपि बुझाउने गरेको तर, महन्तले कुनै हिसाबकिताबसमेत सार्वजनिक नगरेको बताए ।