इटहरी : झापा र सुनसरी जिल्लाको छुट्टाछुट्टै स्थानहरूबाट लागूऔषध ब्राउनसगुरसहित ८ जनालाई प्रहरीले पक्राउ गरेको छ ।
मंगलबार दिउँसो लागूऔषध नियन्त्रण ब्यूरो विराटनगर र जिल्ला प्रहरी कार्यालय सुनसरी तथा मातहत प्रहरी कार्यालयहरूबाट खटिएको प्रहरी टोलीले ब्राउनसुगरसहित ६ जनालाई पक्राउ गरेको छ ।
पक्राउ पर्नेमा इटहरी ९ का २४ वर्षीय आकाश थापा, धनकुटा महालक्ष्मी नगरपालिका ९ का २४ वर्षीय विकाश तामाङ, धरान १४ का ३२ वर्षीय अविजल थापा, धरान १५ का २१ वर्षीय मोहन राई, धरान ५ का २२ वर्षीय अनक राई र भोजपुरका २२ वर्षीय विशन राई रहेका छन् ।
उनीहरूलाई १८ ग्राम ३४० मिलिग्राम ब्राउनसुगर, २ वटा मोटरसाइकल र १ वटा स्कुटरसहित नियन्त्रणमा लिइएको प्रहरीले जनाएको छ ।
त्यसैगरी झापाको अर्जुनधारा नगरपालिका ८ का ३९ वर्षीय सरोज गहतराजलाई १ ग्राम ३६० मिलिग्राम ब्राउनसुगरसहित प्रहरी चौकी शनिश्चरेले पक्राउ गरेको छ । यस्तै, मेचीनगर १५ का २६ वर्षीय पर्वत राजवंशीलाई ३४० मिलिग्राम ब्राउनसुगरसहित प्रहरी चौकी ज्यामिरगढीले पक्राउ गरेको छ ।
लागूऔषधसहित पक्राउ परेका आठैजनामाथि सम्बन्धित प्रहरी कार्यालयबाट पक्राउ गरेको कोशी प्रदेश प्रहरी कार्यालय विराटनगरले जनाएको छ ।
Discussion about this post