विराटनगर : विराटनगरमा जारी नाटक महोत्सवको दोस्रो दिन ‘जयमाया आफू मात्रै लिखापानी आइपुगी’ मञ्चन भएको छ ।
इन्द्रबहादुर राई लिखित कथालाई नाट्य रुपान्तरण र निर्देशन जीवन बरालले गर्दै कदम थिएटर दमकले उक्त नाटक प्रस्तुत गरेको हो ।
नाटकले दोस्रो विश्वयुद्धताका बर्मामा जापानी सेनाको आक्रमणपछि नेपालीहरू ज्यान जोगाउन आसामको लिखापानी तिर भाग्दाको यात्राको कथा देखाएको थियो ।
नाटकमा नवीन रिजाल, रश्मी उप्रेती, परुमा राई, नवीन भण्डारी, रोशन मुर्मु लगायतको अभिनय रहेको छ । हाटखोलास्थित गुरुकुलमा असार ५ गतेसम्म चल्ने नाटक महोत्सवको तेस्रो दिन सोमबार दुईवटा नाटक मञ्चन हुनेछन् ।
दिउँसो १ बजे ह्वी क्यान संस्थाले ‘स्कूल’ मञ्चन गर्नेछ भने दिउँसो ३ बजे पिस नेपालले ‘हेत्छाकुप्पा’ मञ्चन गर्नेछ ।
असार ४ गते दिउँसो ३ बजे गौरादह जेसीज तथा झोराहाट नाट्य समूहले ‘सुरुङ’ मञ्चन गर्ने छ भने अन्तिम दिन दिउँसो ३ बजे कलालय इटहरीले ‘शत्रु’ नामको नाटक मञ्चन गर्ने जनाइएको छ । महोत्सवको पहिलो दिन आयोजकले चौथो अध्याय मञ्चन गरेको थियो ।
कोशी प्रदेशको सामाजिक विकास मन्त्रालयको अनुदान सहयोग तथा विराटनगर महानगरपालिकाको सहयोगमा भएको महोत्सवमा कोशी प्रदेशका कुल ६ वटा नाटक मञ्चन गरिने आयोजक गुरुकुल विराटनगरका अध्यक्ष भैरव क्षेत्रीले बताए ।
Discussion about this post