इटहरी : नेपाली कांग्रेसका नेता डा. शशांक कोइरालाले विपक्षी बलियो भएन भने लोकतन्त्र कमजोर हुने बताएका छन् ।
बुधबार नेपाल प्रेस युनियन सुनसरीद्धारा आयोजित भेटघाट कार्यक्रममा उनले दुई ठूला दल नेपाली कांग्रेस र नेकपा एमाले मिलेर सरकार गठन गर्दा लोकतन्त्र कमजोर बन्ने र एकतान्त्रिक शासनतर्फ मुलुक जानसक्ने डर भएको बताए ।
‘कांग्रेस र एमाले मिलेर सरकार गठन गर्दा विपक्ष कमजोर देखिन्छ । एकतान्त्रिक शासनतर्फ हामी जान सक्ने सम्भावना छ,’ उनले भने, ‘देशमा दरिलो विपक्ष भएको अवस्थामा मात्रै सन्तुलन मिल्छ । नभए सत्ता पक्षले जे गर्दा पनि हुने देखिन्छ ।’
कम्युनिस्टसँग मिल्नुपर्ने कारण नभएको बताएका उनले सङ्घीयता कार्यान्वयन विकेन्द्रीकरणलाई पूर्ण रूपमा लागू गर्नुपर्ने धारणा राखे ।
यसैबीच रास्वपा सभापतिसमेत रहेका गृहमन्त्री रवि लामिछानेले निश्चित व्यक्तिलाई जोगाउन रातारात सत्ता समीकरणमा फेरबदल हुन लागेको आरोप लगाउनु गलत रहेको उनले टिप्पणी गरे ।
लामिछानेले सत्ता छाड्नुपर्दाको पीडा व्यक्त गरेको कोइरालाले आरोप लगाए ।
उनले भने, ‘अगुल्टाले हानेको कुकुर बिजुली चम्कँदा तर्सिन्छ लामिछाने जीलाई नि यस्तै भएको छ ।’ प्रधानमन्त्री पुष्पकमल दाहालले राजीनामा दिन आलटाल गरेपछि एमालेले आफ्ना मन्त्रीहरू फिर्ता बोलाएर दबाब दिनुपर्ने कोइरालाको भनाइ छ ।
Discussion about this post