विराटनगर : विद्यार्थीहरूलाई उत्पादनमा जोड्ने अभियानमा विद्यालयहरू लाग्नुपर्ने मुख्यमन्त्री हिक्मतकुमार कार्कीले बताएका छन् ।
मंगलबार (आज) झापाको दमकमा रहेको हिमालय माध्यमिक विद्यालयको ६९ औँ वार्षिकोत्सव तथा अभिभावक दिवस कार्यक्रममा बोल्दै मुख्यमन्त्री कार्कीले आइटी र प्रविधिसँग शिक्षालाई जोडेर अघि बढ्नु पर्ने धारणा राखे ।
उनले दातृ निकाय र प्रदेश सरकारसँग साझेदारीमा यस्ता कार्यक्रमहरू सञ्चालन गर्नुपर्ने बताए । यसका लागि कोशी प्रदेश सरकार तयार रहेको उनले बताए ।
आइटीको तालिम लगायतका काम र आयआर्जनसँग जोड्ने काममा कोशी प्रदेश सरकारले ध्यान दिइरहेको उनले बताए ।
शिक्षा, स्वास्थ्य र रोजगारीको अभावमा पहाडबाट तीव्र रुपमा बसाइँसराइ भइरहेको भन्दै उनले यसलाई रोक्न पनि गुणस्तरीय तथा आयआर्जनसँग जोडिने गरीको शिक्षा अहिलेको आवश्यक्ता रहेको उनको भनाइ छ ।
मुख्यमन्त्री कार्कीले उब्जाउयोग्य र पर्यटनको प्रचुर सम्भावना रहेको पहाडी र हिमाली क्षेत्रतर्फ बस्ती फर्काउने योजनामा प्रदेश सरकार रहेको बताए ।
मुख्यमन्त्री कार्कीले आजै झापाको गौरादहमा रहेको जनता माध्यमिक विद्यालयको ५७ औँ वार्षिकोत्सव तथा अभिभावक दिवसमा सहभागी भएका छन् ।
गौरादह नगरपालिका १ मा रहेको सो विद्यालयले विद्यालयलाई सहयोग गर्ने र पूर्वशिक्षकसहित विभिन्न व्यक्तित्वलाई सम्मान गरेको थियो ।
Discussion about this post