इटहरी : कोशी प्रदेश प्रहरी कार्यालय, विराटनगर अन्तर्गतको प्रदेश अनुसन्धान टोलीले अभौतिक मुद्रा (क्रिप्टोकरेन्सी), अवैध हुन्डी र अनलाइन गेमिङ कारोबारमा संलग्न रहेको आरोपमा ६ जनालाई पक्राउ गरेको छ।
प्रहरीका अनुसार इटहरी–१२, खनारका २७ वर्षीय प्रभुनारायण चौधरी, इटहरी–११ का २७ वर्षीय प्रशिन चौधरी, इटहरी–७ का सुरज भनिने २२ वर्षीय सन्तोषकुमार साह, इटहरी–११ का २६ वर्षीय चन्दन डोम, मोरङको सुन्दरहरैंचा–२ का २० वर्षीय निसान कुमार खवास र इटहरी–१२ का ३२ वर्षीय लालबहादुर गौतम पक्राउ परेकाहरू हुन्।
प्रहरी टोलीले इटहरी उपमहानगरपालिका क्षेत्रमा तीन दिनसम्म सञ्चालन गरेको विशेष अपरेसनका क्रममा उनीहरूलाई नियन्त्रणमा लिएको हो। प्रारम्भिक अनुसन्धान अनुसार पक्राउ परेकाहरूले डेढ करोड रुपैयाँभन्दा बढीको अवैध कारोबार गरेको पाइएको प्रहरीले जनाएको छ।
प्रभु नारायण चौधरी र प्रशिन चौधरी घरमै बसेर क्रिप्टोकरेन्सी कारोबारमा संलग्न रहेको र उनीहरूबाट क्रमशः दुई थान र एक थान मोबाइल पनि बरामद गरिएको प्रहरीले जनाएको छ।
बिना अनुमति नेपाल राष्ट्र बैंकको नीतिविपरीत विदेशी क्रिप्टोकरेन्सी कारोबारमा संलग्न रहेका उनीहरूलाई प्रहरीले लामो समयदेखि निगरानीमा राखेको थियो।
पक्राउ परेका सबैलाई जेठ २७ गते इलाका प्रहरी कार्यालय इटहरीमा बुझाइएको छ। जिल्ला अदालत सुनसरीबाट सात दिनको म्याद थप गरी उनीहरूमाथि थप अनुसन्धान भइरहेको प्रहरीले जनाएको छ।
Discussion about this post