धरान : धरानस्थित बीपी कोइराला स्वास्थ्य विज्ञान प्रतिष्ठानअन्तर्गतको अस्पताल फार्मेसी सेवा केही दिनदेखि बन्द रहेको छ।
फार्मेसीमा कार्यरत फार्मासिष्टहरूद्वारा सुरु गरिएको आन्दोलनका कारण सेवा प्रभावित बनेको हो।
प्रतिष्ठानले सोमबार एक विज्ञप्ति जारी गर्दै फार्मेसी सेवा अवरुद्ध हुनु गैरकानुनी भएको दाबी गर्दै आपूर्ति कम्पनी केटीएम सेक्युरिटी सर्भिसेज प्रा.लि.ले गैरकानुनी कार्य गरेको जनाएको छ ।
“प्रतिष्ठान जस्तो संवेदनशील क्षेत्रको सेवा एकाएक बन्द गर्नु प्रचलित कानुनको उल्लङ्घन हो,” सहप्रवक्ता डा. अभिजित कुमारद्वारा हस्ताक्षरित विज्ञप्तिमा उल्लेख छ।
वि.सं. २०७० सालमा तीन वर्षका लागि सम्झौता गरिएको सो कम्पनीसँग हालसम्म सेवा निरन्तरता दिइँदै आएको थियो। तर, कुनै पूर्व जानकारी नदिई फार्मेसी सेवा बन्द गरिएको भन्दै प्रतिष्ठानले आपत्ति जनाएको छ।
विज्ञप्तिमा उल्लेख अनुसार फार्मेसीमा कार्यरत जनशक्तिको लापरवाहीका कारण केही दिनअघि सेवाग्राहीबीच विवाद उत्पन्न भई भिडियोसमेत युट्युबमा सार्वजनिक भएको थियो। यसले संस्थाको छवि धूमिल भएको भन्दै प्रतिष्ठानले चिन्ता व्यक्त गरेको छ।
सम्झौताका सर्तअनुसार आपूर्ति गरिएका कर्मचारीले जिम्मेवारी कुशलतापूर्वक निर्वाह नगरेमा कम्पनीले तत्काल नयाँ व्यवस्था गर्नुपर्ने भए तापनि केटीएमले त्यसो नगरेको जनाइएको छ।
साथै, तलब तथा सुविधा नपाएको गुनासोको विषयमा समेत कम्पनीलाई पहिले नै जानकारी दिइसकेको प्रतिष्ठानले जनाएको छ।
“हामी यथाशिघ्र फार्मेसी सेवा सुचारु गर्न आवश्यक पहल गरिरहेका छौं,” विज्ञप्तिमा भनिएको छ, “सेवाग्राहीलाई भएको असुविधाप्रति क्षमाप्रार्थी छौं।”
Discussion about this post