इटहरी : इटहरी उपमहानगरपालिका–५ मा अविरल वर्षापछि सुकुमारी खोलामा आएको बाढीले क्षति पुर्याएको छ।
आइतबार दिउँसो करिब ११ बजेतिर खोलाले तटबन्ध कटान गर्दै एक घर धस्किँदा उक्त घरका अन्दाजी ५० वर्षीय भरत गिरी गम्भीर घाइते भएका छन्।
घर भत्किँदा च्यापिएका गिरीलाई स्थानीयवासी र युवाहरूको सहयोगमा करिब एक घण्टापछि उद्दार गरी नगर अस्पतालको इमर्जेन्सी वार्डमा प्रारम्भिक उपचारका लागि पठाइएको स्थानीय युवा राजेन्द्र खड्काले बताए ।
उनका अनुसार थप उपचारका लागि उनलाई नोबेल अस्पताल पठाइएको छ।
जनता कलेजभन्दा पूर्व करिब डेढ किलोमिटर अगाडि खोलामा आएको बाढीले घर, गोठ, बाटो, डोम बस्ती, थुक्पा फ्याक्ट्री, चौपाया, नर्सरीको पुल, जनता कलेजको पुल र सत्सङ टोलमा समेत ठूलो भौतिक क्षति पुर्याएको खड्काले बताए ।
स्थानीयवासीले सुकुमारी खोलामा वर्सेनि आउने बाढीका कारण त्रास र कठिनाइ व्यहोर्नु परेको गुनासो गर्दै दीर्घकालीन समाधानको माग गरेका छन्।
Discussion about this post