इटहरी : मोरङको बूढीगंगास्थित विराट मेडिकल कलेज टिचिङ हस्पिटलमा नर्सहरू तलब र सेवा–सुविधा वृद्धि माग गर्दै आन्दोलनमा उत्रिएपछि अस्पतालको नियमित सेवा ठप्प भएको छ ।
आकस्मिकसहितका अधिकांश सेवा प्रभावित हुँदा सयौँ बिरामी उपचार अधुरो छाडेर फर्किन बाध्य भएका छन् ।
आन्दोलन भएसँगै अस्पतालको नियमित सेवा अस्तव्यस्त बनेको छ । बिरामीहरू उपचार अधुरो छाडेर फर्किनुपर्ने स्थिति आएको छ ।
नर्सिङ स्टाफहरू शनिबारदेखि अस्पताल परिसरमै प्लेकार्डसहित उत्रिएका हुन् ।
‘न्याय देऊ नत्र सडकमै सेवा दिनेछौं’, ‘सेवामा शिर झुक्दैन’, ‘अन्यायमा घुँडा टेक्दैन’, ‘विदेश जान बाध्य नगर, हामीलाई नेपाल प्यारो छ’जस्ता नारासहित आन्दोलनरत छन् ।
उनीहरूले आफूहरूलाई सरकारले तोकेको न्यूनतम तलब–सुविधा नदिइएको, कार्यदबाब अत्यधिक बढाइएको र प्रशासनले गुनासो बेवास्ता गरेको गुनासो गरेका छन् ।
एक नर्सले भनिन्, ‘आईसीयूमा एक बिरामीका लागि एक नर्स चाहिन्छ । तर हामी एकैपटक तीन बिरामी सम्हालिरहेका छौं । यस्तो दबाबबीच पनि तलब समयमै आउँदैन । हामीलाई हेपिएको महसुस भइरहेको छ ।’
आन्दोलनका कारण अस्पतालको आकस्मिक (इमरजेन्सी)सेवासमेत प्रभावित भएको छ ।
नर्सिङ स्टाफले काम रोकेपछि अस्पतालले ‘डिस्चार्ज’ प्रक्रियासहित बिरामीलाई अन्यत्र पठाउन थालेको छ । भर्ना रोकिएपछि कतिपय बिरामीहरू उपचार अधुरो छाडेर घर फर्किन बाध्य भएका छन् ।
अस्पतालका प्रमुख कार्यकारी अधिकृत डेनिस कार्कीले भने आफूहरूले कसैको श्रम शोषण नगरेको र अस्पतालको वित्तीय क्षमता अनुसारकै सेवा–सुविधा दिइरहेको दाबी गरे ।
उनले भने, ‘नर्सहरूले उठाएका मागहरूमध्ये धेरै नीतिगत तहमा पर्छन् । अस्पतालले आफ्नै निर्णयमा तलब बढाउन सक्दैन । सरकारले स्पष्ट नीति बनाए वार्ता गरेर समाधान गर्न हामी तयार छौं ।’
उनका अनुसार, नर्सहरूले काम नगरेपछि अस्पतालले नयाँ बिरामी भर्ना लिने काम रोकिएको छ । हाल उपचाररत करिब ४५० बिरामीको वैकल्पिक व्यवस्था खोज्नुपर्ने अवस्था आएको छ ।
Discussion about this post